د چين د مصرفي توکو شپږم نړيوال نندارتون چې اوس د چين په های نان ولايت کې روان دی، د نړۍ د بېلا بېلو هېوادونو سوداګر راجلب کړي او ډېر کورني او بهرني توليدات پکې ليدل کېږي. دا د چين د مصرفي بازار پټ ځواک ښکاره کوي.
دلته د چين عصري تخنيکي توليدات د پاملرنې وړ ګرځېدلي دي، د بېلګې په توګه هغه (AI) عينکې چې په بهرنيو ژبو ژباړه کوي، عکسونه اخلي او لغتونه يادولی شي، ځيرک روباټ چې خلکو ته مساج ورکولی شي، الوتونکی موټر او داسې نور.
د چين همدغه ځيرک توليدات د نړيوالو ګډونوالو له خوا ستايل کېږي. پاکستاني سوداګر اسامه داسې ويلي چې د چين ساينس او تخنيک ډېر پرمختللی او د توليداتو کيفيت او خدمتونه يې هم ښه دي. ټول تولیدات د قناعت وړ دي.
په دې نندارتون کې نړيوالو ګډونوالو په ځير سره توليدات انتخاب کړي او په دې هڅه کې دي چې د چين په بازار کې لاسته راوړنې ولري. روسي نجلۍ داریا چې د چين په شمالي ښارونو کې د چاکلیټ کاروبار کوي، غواړي چې په دې نندارتون کې د خپلو توليداتو لپاره بازار ومومي. دغه راز يوه اېټالوي هلک چې چينايي نوم يې جي لي دی، د يوه اېټالوي ايسکريم د پلورلو لپاره هڅه کوي چې اومه توکي يې د های نان ولايت له ځايي مېوو څخه اخيستي، او توليدات يې د کتونکو پام هم راجلب کړی دی.
په ياد نندارتون کې د نړيوالو توليداتو شمېر په سلو کې ۶۵ ته رسېدلی چې د څه باندې شپېتو هېوادونو او سيمو څه د پاسه ۳۴۰۰ برانډونه دلته لیدل کېږي.
ګڼو بهرنيو ګډونوالو د چينايي مصرف کوونکو د راجلبولو لپاره د خپلو توليداتو په ډيزاين کې د چینایي کلتور نښې زيات کړې وې. د ايرلنډ په نندارځي کې کارکوونکي ليام کتونکو ته د توليداتو په اړه معلومات وړاندې کړي او ويلي يې دي چې لازياتو ایرلنډي تصدۍ پر دې ښې پوه شوې چې که غواړي چينايي مصرف کوونکي راجلب کړي او په چين کې بازار ومومي، نو بايد د ډيزاين د مفکورې او د توليداتو د څېړنې برخو کې د دوی اړتياوې پوره کړي.
ډېرو بهرنيو ګډونوالو څو ځلې په دې نندارتون کې ګډون کړی دی. دغه نندارتون د ازادې سوداګرۍ د بندر په توګه د های نان ټاپو له لا ورخلاصون راهیسې لومړی نندارتون دی چې ګډونوالو ته يې هم نوي فرصتونه برابر کړي دي.
په چين کې د يوراګوای سفير نيوال کافرال له خبریال سره د مرکې په ترڅ کې ويلي چې هېواد يې د لومړي نندارتون راهيسې هر کال خپله پيمانه لويه کړې ده او د ازادې سوداګرۍ بندر په توګه د های نان ولايت امتيازي تګلاره يې هم ياده کړې ده. د ده په خبره تصدۍ يې بايد له دې امتيازي تګلارې څخه په استفادې سره له چين سره همکارۍ وکړي او په های نان ولايت کې دې د توليداتو د چمتو کولو فابريکې جوړې کړي، څو په چين او حتی په اسيا کې خپل بازار ومومي.
په چين کې د ايرلنډ سفير نيکولاس اوبرين رسنيو ته ويلي چې دغه نندارتون ځانګړی ارزښت لري او له لومړۍ دورې راهيسې يې پکې ګډون کړی دی. د ده په خبره د سوداګرۍ طبيعت د ګډو ګټو پر بنسټ برياليتوب ته رسېدل دي. د چین او ایرلنډ ترمنځ د سوداګريزو توليداتو ډولونه ډېر غني او پيمانه يې لویه ده، نو روښانه راتلونکې به ولري. موږ غواړو چې هر کال په دې نندارتون کې ګډون وکړو او خپلمنځي همکاريو ته دوام ورکړو.
په دې نندارتون کې نه يوازې د یوراګوای غوره غوښې بلکې د ايرلنډ په شمول د اروپا، افريقا او اسيا هېوادونو بېلابېل توليدات پیدا کولی شو. د دې نندارتون غرفې د يوې نړيوالې نقشې په څېر دي او چين د دې نقشې د مرکز غوندې دی چې له نورو هېوادونو سره تړل شوی دی.
د مکسيکو د يو پوهنتون پروفيسور الکساندرو ليوا داسې ويلي چې لازياتو پرمختيايي هېوادونو نړۍ ته د چين د ورخلاصون په جريان کې لازياته سوداګريزه لار پيدا کړې او د دوی لپاره يې ډېر مهم ستراتيژيک پرمختیايي فرصتونه برابر کړي دي.
