د چین د مصرفي توکو شپږم نړيوال نندارتون د اپرېل په ۱۸مه نېټه پای ته ورسېد. د عمده مېلمه هېواد يعنې د کاناډا د نړيوالې سوداګرۍ وزير مانيندير سدهو د سي اېم جي له خبريال سره د مرکې په ترڅ کې داسې ويلي چې مونږ به په دوامداره توګه د موټرو، کرنې او پولي خدمتونو په شمول ډېرو برخو کې له چين سره همکاريو ته پام واړوو. په دې نندارتون کې ګڼ شمېر بهرني ګډونوال د مانيندير سدهو په شان له چین سره همکاريو ته تمه لري.
ياد نندارتون د چین د اقتصاد او ټولنيز پرمختګ د پنځلسم پنځه کلن پلان د پيل په کال کې د لومړي نندارتون په توګه هم د ازادې سوداګرۍ د بندر په توګه د های نان ولايت تر لا ور خلاصون وروسته لومړی نندارتون بلل کېږي، نو په نړۍ کې د پاملرنې وړ ګرځېدلی دی. د معلوماتو له مخې په دې نندارتون کې د ښودل شويو نړيوالو تولیداتو شمېر د ټولو توليداتو په سلو کې پنځه شپېته برخه نيولې، چې رقم يې د تېر کال د همدې مودې په پرتله په سلو کې ۲۰سلنه زياتوالی ښودلی دی. دغه راز ۲۷۷ نوي توليدات نندارچيانو ته وړاندې شوي، چې شمېر يې د تېر کال د ورته مودې په پرتله دوه چنده زياته شوی، سربېره پردې د سیلانيزو توليداتو د خرڅلاو ځانګړې سيمه او د محصولاتو د اخيستونکو خدمتي مرکز په لومړي ځل جوړ شوی دی. د يادونې خبره دا ده چې ډېرو بهرنيو تصديو په جلا جلا توګه د ازادې سوداګرۍ بندر کې د سوداګرۍ د اسانېدو له فرصت څخه په استفادې په ځانګړې توګه د محصولاتو د اخيستلو او پلورلو ټيمونه جوړ کړي، تر څو چې په نړيوال بازار کې د نړیوالو محصولاتو او چينايي توليداتو د اخيستلو او پلورلو لپاره ښه زمينه برابره کړي او نړيوال سوداګر به د چین له لوی بازار څخه ستر فرصتونه تر لاسه کړي.
کله چې دغه نندارتون د ازادې سوداګرۍ په بندر کې تر سره شوی، نو کورنيو او بهرنيو تصديو ترې څه ګټې اخيستې دي؟ د ازادې سوداګرۍ د بندر د مالياتو د امتيازي تګلارې په رڼا کې ګڼې تصدۍ د خپلو توليداتو له چټکې ګمرکي څارنې څخه برخمنې شوې او ښودل شوي توليدات په چټکۍ سره پلورل شوي دي. نو دغه نندارتون د ازادې سوداګرۍ د بندر د لا ورخلاصون او د فرصتونو د برابرولو يو لوی ډګر ګرځېدلی دی. د تايلنډ د سي پي ګروپ په سږني نندارتون کې نندارچينانو ته يوه نوې قهوه وړاندې کړې ده. په چين کې د دې ګروپ د بورډ د کمېټې مرستیال شيو ځنګ يي رسنيو ته ويلي چې دغه قهوه د ازادې سوداګرۍ د بندر په توګه په های نان ولایت کې د امتيازي ګمرکي تګلارې له پلي کولو راهيسې لومړی توليد دی او مونږ ترې لومړی ګټه اخيستونکي يو. شرکت به مو په راتلونکي کې د دغه ولايت د امتيازي تګلارې په مټ خپلې چارې لا قوي کړي او په چین او حتی په نړۍ کې به بازار ومومي.
د نړيوالو غوره مصرفي توکو د ښودلو او کاروبار ډګر په توګه دغه نندارتون کې څه نوې مصرفي نښې نښانې ښودلې دي؟ مونږ په دې نندارتون کې د ټيټ کاربن لرونکي توليداتو، عينکې او الوتونکي موټرو په شمول مخکښ ساينسي او تخنيکي توليدات، زرغون توليدات او ځيرک مصرفي توکي کتلی شو. دا ښکاري چې ساينس او تخنيک له انساني احساساتو او ارزښتونو سره پيوست شوی او د مخکښې او عصري ټکنالوژۍ په برخه کې د خلکو اړتياوې د توپيري توليداتو او خدمتونو له لارې پوره شوې او مصرف کوونکي نه يوازې په اسانۍ سره محصولات اخيستلی شي، بلکې د ژوند اسانتياوې تر لاسه کولی شي.
نو د چين په مصرفي بازار کې نوي بدلونونه به بهرنيو تصديو ته کوم کوم نوي فرصتونه برابر کړي؟
لومړی د چينايانو د ژوند کيفيت به لوړ شي او بازاري پيمانه به لا لويه شي. دوهم د چينايانو نوې مصرفي اړتياوې رامنځته شوې څو چې همدا د تصديو نوښت پرمخ بوزي، خو دا لا مهمه ده چې په چین کې د ورخلاصون په لا پراخوالي سره سره به چینايي بازار ته د بهرنيو تصديو د داخلېدو خنډونه نور هم کم شي، چې دا به د هغوی لپاره لا زیاته پرمختیايي لاره هواره کړي. د ډېرو بهرنیو تصديو په اند چين چې ډېر لوی بازار او بشپړ صنعتي ځنځيرونه لري، عادلانه بازاري سیالي پکې کولی شي او مخکښې ټکنالوژۍ په کې ډېرې کارول کېږي، د نړیوالو تصديو لپاره تر ټولو ښه سوداګريز ازمايښتي ځای دی.
