امریکا له ایران سره اوربند غځولی دی

د امريکا ولسمشر ډونالډ ټرمپ اعلان کړی چې له ایران سره د دوه اوونیو اوربند به تر هغې وغځوي، څو تهران خپل وړاندیز وړاندې کړي او روانې خبرې اترې پایلې ته ورسېږي. ټرمپ په خپلې ټولنیزې شبکې کې ویلي، دا پرېکړه د سیمې د حالاتو او د پاکستان د مشرانو په غوښتنه شوې ده، څو د ایران استازي د یو ګډ وړاندیز پر سر هوکړې ته ورسېږي. هغه ټینګار کړی چې امریکايي ځواکونه به د اوربند تر څنګ بشپړ چمتووالی وساتي. په ورته وخت کې، د تسنیم خبري اژانس راپور له مخې، ایران د پاکستان په منځګړیتوب خبرو کې ګډون رد کړی دی. راپور زیاتوي چې دا پرېکړه وروسته له هغې شوې چې امریکا له خپلو غوښتنو څخه شاته نه شوه. شنونکي وایي، د اوربند غځېدل که څه هم د تاوتریخوالي د کمېدو لپاره مهم ګام بلل کېږي، خو د دوامدارې هوکړې لپاره د دواړو لورو نرمښت اړین دی.