سپینه ماڼۍ کې؛ د خبریالانو کلنۍ مېلمستیا د امنیتي پېښې له امله ګډوډه شوه

د سپینې ماڼۍ د خبریالانو ټولنې کلنۍ مېلمستیا، چې د امریکا د ولسمشر ډونالډ ټرمپ په ګډون جوړه شوې وه، د یوې ناڅاپي امنیتي پېښې له امله ګډوډه شوه. د راپورونو له مخې، د پروګرام په پیل کې، کله چې ټرمپ او د هغه مېرمن مېلانیا ټرمپ هم په تالار کې حاضر وو، د ډزو ته ورته غږ واورېدل شو. له دې سره سم، د پولیسو ځانګړي ځواکونه د پېښې ځای ته داخل شول او د امنیتي تدابیرو په ترڅ کې ولسمشر او نور لوړپوړي چارواکي د پټو خدماتو له لوري له تالاره وایستل شول. د پېښې د علت او احتمالي زیانونو په اړه تر اوسه نور جزییات نه دي ورکړل شوي. خو ټرمپ ویلي، چې بریدګر نیول شوی دی.