د چين د کمونېست ګوند د مرکزي کمېټې د سياسي بيورو غړي او خارجه وزير وانګ يي د اپريل په ۲۹مه نېټه په پلازمېنې بېجينګ کې له خپلې استراليايي سيالې پني ونګ سره لیدلي او د دواړو هېوادونو د ډيپلوماتيکو او ستراتېژيکو خبرو اتم پړاو يې ورسره ترسره کړی دی.
وانګ يي هيله ښودلې، چې دواړه هېوادونه د لوړپوړو چارواکو تګ راتګ وساتي او ستراتېژيک متقابل باور تقويه او همکارۍ پراخې او خپلمنځي اړيکو ته مثبت عوامل برابر کړي.
نوموړي د چين او استراليا ترمنځ کلتوري تګ راتګ د دواړو خواوو په ګټه بللی او په وينا يې د دواړو هېوادونو حکومتونه دې د متقابل پوهاوي د زياتېدو لپاره کار وکړي.
وانګ يي زياته کړې، د ارام سمندر د ټاپوګانو هېوادونو سره د چين دوستانه همکارۍ د کوم درېيم لوري په خلاف نه دي او استراليا دې ورته په سم نظر وګوري. چين د اسيا او ارام سمندر د اقتصادي همکارۍ سازمان د نوبتي رئیسه هېواد په توګه غواړي له استراليا او نورو خواوو سره همکارۍ پياوړې کړي او د اسيا او ارام سمندر د ګډې ټولنې بهیر بيا فعال او سمسور کړي. چين او استراليا دې په ګډه د نړيوالې ازادې سوداګرۍ سیسټم او صنعتي او اکمالاتي ځنځير وساتي او د تودو مسئلو د سياسي حل لپاره دې رغنده رول ولوبوي.
وانګ يي همدارنګه د تايوان مسئلې په اړه د چين دريځ هم له خپلې استراليايي سيالې سره شريک کړی دی.
پني ونګ ويلي، هېواد يې د يوه چين پېژندنې پر اصل ټينګار لري او د تايوان له جلا غوښتونکو څخه ملاتړ نه کوي او هيله يې ښودلې، چې دغه مسئله په سوله ييزو لارو چارو حل شي.
نوموړې ويلي، استراليا او چين په اقتصادي برخه کې يو د بل له برتریو ګټې پورته کولی شي او په بېلا بېلو برخو کې يې همکارۍ له ګډو ګټو سره سمون لري او په خبره یې، استراليا د چين په کوربتوب د اسيا او ارام سمندر د اقتصادي همکارۍ سازمان د مشرانو د غير رسمي غونډې له جوړېدو ملاتړ کوي، د ټاپوګانو هېوادونو سره د نورو له همکارۍ سره مخالفت نه کوي او له چين سره به په ګډه نړيوالې قاعدې وساتي او د انرژۍ خوندیتوب به تامين کړي.
