په کونړ کې؛ د یوه نوماند درې کمپاینران وژل شوي دي

په کونړ کې د یوه نوماند پر مېلمستون برید شوی او درې کسه پکې وژل شوي دي. په کونړ کې د ولسي جرګې د ټاکنو یو نوماند وایي، تېره شپه یې په نرنګ ولسوالۍ کې پر مېلمستون حمله وشوه او درې خپلوان یې په ډزو ووژل شول. قاري عطاالله صافي ویلي، وژل شوي کسان یې نږدې خپلوان وو چې په انتخاباتي کمپاین کې یې همکاري ورسره کوله. د کونړ د والي ویاند عبدالغني مصمم دغه پېښه تایید کړې، خو وايي، تر اوسه د پېښې عاملین نه دي په ګوته شوي. له کونړه د درې مېرمنو په ګډون ۳۱ کسانو ولسي جرګې ته ځانونه نوماند کړي دي.