د چين د کمونېست ګوند د مرکزي کمېټې د سياسي بيورو غړي او بهرنيو چارو وزير وانګ يي د مې په ۶مې نېټې په پلازمېنې بېجينګ کې له خپل ايراني سيال عباس عراقچي سره ليدلي او پر ځينو مسئلو يې ورسره خبرې کړې دي.
عراقچي له چيني سیال سره په خبرو کې د ايران او امريکا د وروستيو مذاکراتو او د ایران د اوسني پلان په اړه غږېدلی او ويلي یې دي، چې سياسي بحران په پوځي لارو نه شي حل کېدای.
نوموړي ويلي، ایران به خپل ملي حاکميت وساتي او د سوله ييزو مذاکراتو له لارې به موافقه جوړه او د ستونزو د حل لپاره به يو بشپړ او دايمي پلان برابرکړي.
وانګ يي د ايران د وضعيت په اړه د چين اصل او دریځ څرګند کړی او ويلي يې دي، چې چين د امريکا او ایران د جنګ له پيل راهیسې د سوله ييزو مذاکراتو لپاره هڅې کوي.
نوموړي د امريکا او ایران ترمنځ د خبرو اوسنی وضعيت په کليدي پړاو کې بللی او په خبره یې، د ښکېلو لوريو ترمنځ اوربند باید وساتل شي او مذاکراتو ته باید دوام ورکړي.
