د امریکا اراونډ د ورډ « Around the World» مجلې پر خپلې وېبپاڼې يوې لیکنې کې ويلي، چې د کارګرو نړیوالې ورځې د رخصتۍ په درشل کې د چینایانو د تګ راتګ شمېر او اقتصادي تمايل ډېر و او د سیلانۍ نړیوال بازار د بیا سمسورتیا لپاره يې یو مهم شاخص برابر کړی دی.
د کارګرو نړیوالې ورځې په رخصتۍ کې په چین کې د خلکو د تګ راتګ شمېر یو اعشاریه ۵۱۷ ميلیارډه ښودل شوی، چې د ۲۰۲۵ کال د همدې مودې په پرتله ۳ اعشاریه ۴۹ سلنه زیاتوالی ښيي او په کور دننه یې د سيلانۍ نوی ریکارډ جوړ کړی دی. په ورته وخت کې په چین کې د مصرف پورې تړلو چارو عواید هم د تېر کال د همدې مودې په پرتله ۱۴ اعشاریه ۳ سلنه زیات شوي، چې پکې د خدماتو مصرف ډېر زیات ښودل شوی دی.
د چين د خدماتو مصرف دغه “نوي” زیاتوالي د پراخ بازار پټ توان راښکاره کړی دی.
ولې د خدماتو سږنی مصرف د کارګرو نړیوالې ورځې په رخصتۍ کې تود ټکی و؟
روان کال د چین د ۱۵م پنځه کلن پلان له پيل سره برابر دی. د دغه هېواد یو لړ تګلارې د چارو د هڅولو رول لوبوي او د ۱۵م پنځه کلن پلان په وړاندیز کې يې ویل شوي، چې په هېواد کې به یې د خدماتو چارو توان او کیفیت نور هم پياوړی شي او په تېر اپرېل کې د خدماتي چارو په غونډه کې د لازیاتو چیني خدماتو د برانډونو د جوړولو وړانديز هم شوی دی.
د چین حکومت د کارګرو نړیوالې ورځې له رخصتۍ مخکې، د خدماتي چارو د پرمختګ او کیفیت د لوړتیا نظرونه هم خپاره کړي دي.
د چين یادو وړانديزونو او نظرونو د کارګرو نړیوالې ورځې د رخصتۍ په جریان کې د خدماتو د مصرف د زیاتوالي حیاتي ځواک برابر کړی و.
د چین د رینمین پوهنتون د اقتصاد پوهنځي پروفیسور وانګ شیاو سونګ رسنيو ته ويلي، چې د روان کال په لومړۍ ربع کې د چین اقتصاد “ښه پیل” کړی او د خدماتو پرچون پلور يې د تېر کال د همدې مودې په پرتله ۵ اعشاریه ۵ سلنه زیاتوالی موندلی او د توکو پرچون پلور یې له ۲ اعشاریه ۲ سلنې څخه لوړ دی.
د روان کال د کارګرو نړیوالې ورځې په رخصتۍ کې ډېرو چینایي سیلانیانو بهر ته سفرونه کړي او د نړۍ د سیلانيزو چارو د بیا سمسورتيا لپاره يې خوځنده ځواک برابر کړی دی.
د کینیا د سیلانۍ ادارې مسؤل کیموتای نګینو رسنيو ته ويلي، چین په نړۍ کې د سیلانۍ د مصرف اصلي چلوونکی ګرځېدلی او د چینایي سیلانیانو لپاره د لوړ کیفیت او ژورو خدماتو تجربې به د نړیوالو سیلانیزو چارو د پرمختګ بڼه بیا جوړه کړي.
د نړیوال اقتصاد بیا سمسورتيا کمزورې ده او لامل یې دا ښودل کېږي، چې د ځينو هېوادونو د ځاني سوداګرۍ ساتونکې تګلارې مخ په زیاتېدو دي، چې له کبله یې نړیوال اقتصاد له ناڅرګند برخلیک سره مخ شوی دی.
د کارګرو د رخصتۍ په بهیر کې د چین د اقتصاد داخلي ځواک نړیوال اقتصاد ته د پرمختګ پياوړې زمينه برابر کړې ده.
د جرمني د ډیوېچ بانک（Deutsche Bank）په شمول څو نړیوالو بانکونو او سازمانونو په دې وروستیو کې د چین د اقتصادي ودې وړاندوینې لوړې کړې دي. د امریکا ایوراسیارېویو（Eurasiareview.com）پر خپلې وېبپاڼې تبصره خپره کړې او پکې يې ويلي، چې چین ګام په ګام د نړۍ له فابریکې څخه پر نړيوال بازار بدلېږي او د نړیوال اقتصاد د باثباته پرمختګ لپاره مهم هېواد دی.
