د جيبوتي د ولسمشر اسماعيل عمر ګويلې په بلنه، د چين د دولت رئيس شي جين پينګ ځاګړي استازي او د ملي ولسي کانګرېس د دايمي کمېټې مرستيال لوه سانګ جيانګ څون پر ځايي وخت د مې په نهمه نېټه په جيبوتي کې د دغه هیواد د ولسمشر ګويلې د لوړې په مراسمو کې ګډون کړی دی او ګويلې په همدې ورځ له نوموړي سره ليدلي دي.
لوه سانګ جيانګ څون ګويلې ته د رئيس شي جين پينګ مبارکي او نېکې هيلې وړاندې کړې او په خبره يې، له تېرو څو کلونو راهيسې د رئيس شي جين پينګ او ولسمشر ګويلې د ستراتيژيکې لارښوونې په رڼا کې د چين او جيبوتي ترمنځ د هر اړخيزې ستراتيژيکې همکارۍ اړيکو ژورتيا موندلې ده.
لوه سانګ جيانګ څون ويلي، چې هیواد به يې له جيبوتي سره د دواړو مشرانو ګډ توافقات ښه عملي کړي، دوه اړخيزې دوديزې دوستۍ ته به دوام او پرمختګ ورکړي، همکارۍ به پراخې کړي او خپلمنځي اړيکې به لاپياوړې کړي.
ګويلې د لوه سانګ جيانګ څون له لارې شي جين پينګ ته د نېکو هيلو وړاندې کولو ترڅنګ مننه کړې او ويلي يې دي، چې جيبوتي چين د باور وړ ملګری ګڼي او ورسره به د بېلا بېلو برخو همکارۍ او تبادلې پياوړې کړي، په نړيوالو چارو کې به همغږۍ وساتي او دوه اړخيزې اړيکې به نوې مرحلې ته ورسوي.
