د چين د خارجه وزارت ویاند ګوه جيا کون د مې په ۱۲مې نېټې يوه خبري ناسته ترسره کړې او د خبريالانو پوښتنو ته يې ځوابونه ويلي دي.
يوه خبريال په یادې خبري ناستې کې له ګوه جيا کون څخه پوښتلي، د جاپان لومړۍ وزيرې تاکايچي سانای په تېر نومبر کې د تايوان په اړه ناسمې خبرې وکړې او تراوسه يې بېرته نه دي اخيستي. چيني لوری د جاپان پر نوي مليټاريزم پر له پسې نيوکې کوي او په ورته وخت کې بیا د جاپان لومړۍ وزيرې تاکايچي سانای او ځينو چارواکو یې څو هېوادونو ته سفرونه کړي او د خپل هېواد سوله ييز دريځ يې بيان کړی دی. خو له بلې خوا بیا د جاپان حکومت د وژونکو وسلو پر صادراتو محدوديتونه کم کړي او د سوله ييز اساسي قانون او د امنيتي تامين د درېيو سندونو د تعديل هڅې يې پيل کړې دي. په داسې حال کې د نړۍ نور هېوادونه نه غواړي، چې د چين يا جاپان ترڅنګ ودرېږي او په دغه جنجال کې ځانونه ښکېل کړي. نو چيني لوری د اړوندو هېوادونو د دغې رويې په اړه څه نظر لري؟
د چين د خارجه وزارت وياند ګوه جيا کون دغې پوښتنې ته په ځواب کې ويلي، د جاپان مليټاريزم د اسيا او ارام سمندر د سيمې خلکو ته خورا زيات ناورينونه رسولي دي. اوس د سيمې سمسورتيا او پرمختګ تر دوهمې نړيوالې جګړې وروسته د ټينګ شوي نړيوال نظم پر بنسټ ترسره کېږي.
نوموړي ويلي، د اسيا او ارام سمندر د سيمې مختلف هېوادونه دې دا واقعيتونه له پامه و نه غورځوي چې د جاپان ښي اړخي په اوسنيو تګلارو او کړنو نړيوال نظم او د سولې بنسټ ويجاړوي. د سيمې هېوادونه دې خپلې سترګې پرانېزي او د جاپان د نوي مليټاريزم پر وړاندې دې ګډه مقابله وکړي او د سولې نظم دې خوندي وساتي.
