کندهار؛ د پنجوايي دوراهي سړک د دویم فاز د قیر کولو چارې پیل شوې

د کندهار ولایت د ښاروالۍ مسوولینو خبر ورکړی، چې د ښار د اوومې ناحیې اړوند د پنجوايي دوراهي سړک د دویم فاز د قیر کولو چارې پیل شوې دي. د مسوولینو په خبره یاده پروژه د ښاروالۍ له پراختیايي بودیجې څخه د ۷۰ میلیونه افغانیو په لګښت د ښاري پراختیا او معیاري زیربناوو د پیاوړتیا په موخه پلې کېږي. د سرچینې په وینا، دغه سړک ۱۱۰۰ متره اوږدوالی او ۱۱ متره سور لري، چې د لومړي فاز ټولې رغنیزې چارې یې څو میاشتې وړاندې بشپړې شوې وې او اوس د دویم فاز د قیر کولو چارې پیل شوې دي. سرچینې زیاته کړې، چې د دې پروژې په بشپړېدو سره به د سیمې د اوسېدونکو د تګ راتګ اسانتیاوې زیاتې شي، د ښار دننه به ترافیکي ستونزې کمې شي او ښاري خدمتونه به لا معیاري بڼه خپله کړي.