اوچا: له ۲۰۲۳ کال راهیسې څه باندې ۶میلیونه افغانان هېواد ته راستانه شوي

د ملګرو ملتونو د بشري مرستو د همغږۍ دفتر (اوچا) راپور ورکړی، چې له ۲۰۲۳ کال راهیسې څه باندې ۶ میلیونه افغانان بېرته هېواد ته راستانه شوي دي. اوچا د کډوالو د نړیوالې ورځې په مناسبت په خپل تازه راپور کې ویلي چې ډېری راستنېدونکي هغو سیمو ته ستانه شوي چې له وړاندې له بېوزلۍ، د کاري فرصتونو له کمښت او لومړنیو خدماتو ته له محدود لاسرسي سره مخ وې. دغه سازمان ټینګار کړی چې د ډېرو کورنیو لپاره هېواد ته راستنېدل د ستونزو پای نه، بلکې د نوو ننګونو پیل دی. د اوچا په وینا، د دې وضعیت د ښه مدیریت لپاره په زیانمنو سیمو کې دوامدارو بشري او پراختیايي مرستو ته جدي اړتیا شته. دا په داسې حال کې ده چې افغان کډوال په یو شمېر هېوادونو، په ځانګړې توګه ایران او پاکستان کې، د جبري ایستلو او نورو ګڼو ستونزو سره مخ دي. بلخوا، د ملګرو ملتونو پراختیايي پروګرام (UNDP) هم ویلي چې افغانستان د نړۍ له هغو هېوادونو څخه دی چې د بې‌ځایه شویو او راستنېدونکو وګړو له پراخ بحران سره مخ دی.