ډبلیو اېچ او؛ افغانستان کې د سختې ګرمۍ د څپې په اړه خبرداری ورکړی

د روغتیا نړیوال سازمان(ډبلیو ایچ او)په افغانستان کې د هوا د تودوخې د لوړېدو له امله له خلکو غوښتي چې د سختې ګرمۍ پر وړاندې د ځان او خپلو کورنیو د خوندي ساتلو لپاره اړین احتیاطي تدابیر ونیسي. یاد سازمان په خپله اېکس‌پاڼه لیکلي چې په منظم ډول د اوبو څښل، د نریو او ازادو جامو اغوستل، د پلنې یا سیوري لرونکې خولۍ کارول، په یخو اوبو لمبېدل او د ورځې په اوږدو کې د سپکو خوړو خوړل د بدن د تودوخې په کنټرول کې مرسته کوي.د روغتیا نړیوال سازمان له خلکو غوښتي چې د ګرمۍ د اغېزو د کمولو لپاره په سیورو کې پاتې شي او هره ورځ له دوو تر درېیو ساعتونو پورې په سړو ځایونو کې وخت تېر کړي. دغه سازمان خبرداری ورکړی چې د سختې ګرمۍ پر مهال باید له درنو بدني فعالیتونو او په پارک شویو موټرو کې د ماشومانو له پرېښودو ډډه وشي.