ولسي جرګه وايي، د افغانستان د سولې په تړاو د امریکا په ګډون د نړۍ د ټولو هېوادونو هڅې باید د افغانستان د سولې له عالي شورا او د دغه هېواد له خلکو سره شریکې شي.
د ولسي جرګې ریيس عبدالرووف ابراهیمي د جرګې په پرونۍ غونډه کې وویل، د ولس استازي د سولې له هغه بهیره ملاتړ کوي چې جزیات یې روښانه وي.
ابراهيمي زياته کړه: «د سولې موضوع یوه ملي پروسه او د افغانستان د خلکو اساسي اړتیا ده، موږ سوله غواړو او نه یې ردوو، خو چې د سولې په اړه د خلکو قناعت حاصل کړي. په دې برخه کې دې له ټولو جزیاتو سره یوه روښانه موضوع له خلکو او ملي شورا سره شریکه شي. موږ داسې سوله غواړو او ملاتړ یې کوو».
د ولسي جرګې دا دريځ په داسې حال کې دی چې تازه د افغانستان لپاره د امریکا د بهرنیو چارو وزارت ځانګړي سلاکار زلمي خلیلزاد ویلي، امریکا حاضره ده چې پرته له شرطه له طالبانو سره خبرې وکړي.
خلیلزاد له ځینو لویدیځو رسنیو سره په مرکه کې ویلي چې امریکا د افغانستان د ستونزو د حل لپاره د مناسبې لارې غوښتونکې ده، داسې لاره چې ارزښت یې د افغانستان د تېرو څو کلونو لګښتونو سره برابروي.
پخوا تر دې دا خبره تایید شوې وه چې د طالبانو یوه پلاوي په قطر کې له امریکايي چارواکو سره لیدلي او په دې اړه داسې راپورونه هم خپاره شول چې افغان چارواکو په سعودي عربستان کې له طالبانو سره لیدلي، خو د افغانستان د سولې د عالي شورا ريیس محمد کریم خلیلي ویلي چې تر اوسه د افغان چارواکو او وسله والو طالبانو تر منځ هېڅ ډول خبرې نه دي شوې.
په ورته وخت کې د سولې د عالي شورا د مشرتابه پلاوي غړی حبیب الله فوزي وايي، د افغانستان د سولې په اړه د دې شورا ټول مسایل او اقدامات د افغانستان له خلکو او ملي شورا سره شریک شوي دي.
دی وايي:
«په دې برخه کې د افغانستان له کابو ټولو قشرونو سره خبرې شوې او د ټولنې لوی اکثریت د سولې او مصالحې موضوع تایید کړې او د ټولنې لویه اړتیا ګڼل شوې ده چې ملي شورا هم پکې شامله ده. ملي شورا سره تل اړیکې نیول شوې او نظریات یې اخيستل شوي دي».
په ورته وخت کې د ملي شورا ځینې غړي وايي، کلونه کېږي چې د افغانستان د سولې لپاره هڅې کېږي، خو تر اوسه يې داسې مثبته نتیجه چې سوله او ثبات رامنځته کړي نه ده ورکړې.
دوی هيله لري چې دا ځل روانې هڅې ښه نتیجه ورکړي.
