د لوړو زده کړو وزیر؛ د علم پر ارزښت او د مسوولیتونو پر ښه ترسره کولو ټینګار کړی

د لوړو زده کړو وزارت وايي، د دغه وزارت وزیر شیخ‌الحدیث مولوي نداء محمد ندیم د خوست ولایت د شیخ زاید پوهنتون د ۹۲۵ محصلینو د فراغت په مراسمو کې ګډون او وینا کړې ده. د وزارت د خبرپاڼې له مخې، په دغو مراسمو کې د خوست والي، د ولایتي ادارو مسوولینو، د پوهنتون رهبرۍ، استادانو، محصلینو او ګڼ شمېر نورو ګډون کړی و. مولوي نداء محمد ندیم فارغو محصلینو او د هغوی کورنیو ته مبارکي ورکړې او له هغوی یې غوښتي چې خپلې زده کړې او مسلکي فعالیتونه لا پیاوړي کړي او د هېواد د پرمختګ لپاره خدمت وکړي. هغه همدارنګه د علم پر ارزښت، د مسوولیتونو پر ښه ترسره کولو او د نظام د قوانینو او لارښوونو پر عملي کېدو ټینګار کړی دی.