یوناما: د پاکستان د بریدونو له امله نږدې ۴۰۰ افغان ملکي وګړي وژل شوي او ټپیان شوي

د ملګرو ملتونو د مرستندویه پلاوي (یوناما) په خپل تازه راپور کې ویلي، چې د پاکستان د پوځي رژیم د بریدونو له امله د افغانستان په ځینو سیمو کې د اپرېل له لومړۍ نېټې څخه د جون تر ۳۰مې نېټې پورې ۵۷ ملکي وګړي شهیدان شوي او ۳۴۲ نور ټپیان شوي دي. د راپور له مخې، په شهید شویو کسانو کې شپږ ښځې او ۳۱ ماشومان هم شامل دي. یوناما زیاته کړې، چې د ملکي وګړو تر ټولو ډېر تلفات د جون په ۲۸مه د پاکستان د هوايي بریدونو له امله په پکتیکا، کونړ او پکتیا ولایتونو کې ثبت شوي دي. په راپور کې همداراز راغلي، چې د جون په ۸مه د ناپېژندل شویو چاودېدونکو توکو د چاودنو له امله، د ډیورنډ فرضي کرښې ته څېرمه سیمو کې ۱۳ نور ملکي وګړي وژل شوي یا ټپیان شوي دي. د دغه راپور پر بنسټ، د افغانستان د بهرنیو چارو وزارت د پاکستان د پوځي رژیم بریدونه د افغانستان د ملي حاکمیت سرغړونه بللې او د اسلام‌اباد هغه ادعاوې یې بې‌بنسټه ګڼلې، چې ګواکې وسله‌وال یې په نښه کړي دي. دغه وزارت له نړیوالې ټولنې غوښتي، چې د پاکستان «تجاوزګرانه کړنې» وغندي. بلخوا، په کابل کې د پاکستان سفارت یوناما ته ویلي، چې د پاکستان مخالفې وسله‌والې ډلې لا هم د افغانستان له خاورې د دغه هېواد پر ضد د بریدونو لپاره کار اخلي.