تخار؛ د ۱۵۰ څاه‌ګانو په جوړېدو ۱۰ زره کورنیو ته د پاکو اوبو زمینه برابره شوې

د تخار ولایت ځایي چارواکي وایي، چې په دغه ولایت کې یوه مرستندویه بنسټ په مرکز او ولسوالیو کې د څه باندې ۱۵۰ څاه‌ګانو په کیندلو سره د شاوخوا ۱۰ زره کورنیو لپاره د څښاک پاکو اوبو ته د لاسرسي زمینه برابره کړې ده. د دغه بنسټ مسوولینو ویلي، چې د څاه‌ګانو پر کیندلو شاوخوا ۲۲۸ زره امریکايي ډالر لګښت شوی چې د ترکیې د خلکو له لوري ورکړل شوی دی. د تخار اوسېدونکي وايي، د څاه‌ګانو له جوړېدو سره یې پاکو اوبو ته لاسرسی پیدا کړی، ځکه تر دې وړاندې یې له ناپاکو اوبو ګټه اخیسته. دوی له مرستندویه بنسټونو او اړوندو مسوولینو غواړي چې د پاکو اوبو د کمښت ستونزې ته لا ډېره پاملرنه وکړي.