المان افغانستان د افغان کډوالو د ستنولو بله الوتنه پلان کړې ده

الماني رسنۍ وایي، د دغه هېواد حکومت نن، سې‌شنبه، افغانستان ته د رد شویو افغان پناه‌غوښتونکو د ایستلو بله الوتنه پلان کړې ده. د راپورونو له مخې، ټاکل شوې الوتکه د شپې شاوخوا یوه بجه له لایپزیګ/هاله هوايي ډګره د کابل پر لور روانه شي. که الوتنه ترسره شي، دا به دویم ځل وي چې المان له افغانستان سره د مستقیمې الوتنې له لارې د هغو افغانانو په ګډون کسان باسي چې جرمي سابقه نه لري. راپورونه زیاتوي، د المان حکومت تر اوسه د دې الوتنې په اړه رسمي جزییات نه دي خپاره کړي او د ایستل کېدونکو کسانو کره شمېر هم نه دی څرګند شوی.