په هېواد کې ټول دولتي روغتونونه ډيجیټلي کیږي

د عامې روغتیا د وزیر نور جلال جلالي په مشرۍ د دولتي روغتونونو د ډیجیټلي کولو په موخه له اړوندو مسوولینو سره ناسته وشوه. روغتیا وزارت ویلي، په دې ناسته کې د روغتیايي معلوماتو د برېښنايي ثبت او مدیریت، د روغتونونو د چارو د ډیجیټلي کولو او شته امکاناتو او اړتیاوو په اړه بحث وشو. جلالي ویلي، د روغتونونو ډیجیټلي کول به د ناروغانو د ثبت، درملو او طبي وسایلو د مدیریت او مالي او اداري چارو په برخه کې لا ډېر شفافیت رامنځته کړي. هغه ټینګار کړی چې د دې بهیر په بشپړېدو سره به د ناروغانو خدمتونه چټک، د روغتیايي کارکوونکو چارې منظمې او د روغتیايي خدمتونو کیفیت ښه شي.