زابل؛ د ۱۲ میلیونه افغانیو په لګښت ۴ پراختیايي پروژې بشپړې شوې

د زابل ولایت په مرکز قلات ښار کې د نږدې ۱۲ میلیونه افغانیو په لګښت د څلورو پراختیايي پروژو چارې بشپړې او ګټې اخیستنې ته سپارل شوې دي. د زابل د کلیو، بیارغونې او پراختیا رئیس مولوي حکمت‌الله رهبر رسنیو ته ویلي، دغه پروژې د خوړو نړیوال پروګرام په مالي ملاتړ پلې شوې دي. د نوموړي په وینا، په دغو پروژو کې د اوو پولچکونو او اوو ممیزخونو جوړول شامل دي چې ټولیز لګښت یې ۶ میلیونه، ۴۲۵ زره او ۵۰۰ افغانۍ دی. همداراز، د پروژو په ترڅ کې د باراني اوبو د راټولولو لپاره ۷۲۶ کندې جوړې شوې دي، چې هره یوه یې ۱۰ متره اوږدوالی، څلور متره پلنوالی او ۱.۵ متره ژوروالی لري.