د اوکراین د مذاکره کوونکي پلاوي غړي او د بهرنیو استخباراتو ادارې مشر اومېروف د روانې میاشتې په ۱۱مه نېټه ویلي، چې د اوکراین، امریکا او روسیې ترمنځ دوه ورځنۍ درې اړخیزې خبرې اترې په همدې ورځ په عربي متحده اماراتو کې پای ته ورسېدې.
ښکېلې خواوې د بنديانو د تبادلې په اړه هوکړې ته رسېدلي، خو لا يې هم ترمنځ لوی اختلافات پر ځای پاتې دي.
اومېروف په همدې ورځ پر ټولنیزو رسنیو ویلي، د دغو خبرو اترو مهمه لاسته راوړنه د اسیرانو د پراخې تبادلې په اړه هوکړې ته رسېدل وو. ښکېلې خواوې د دې هوکړې د عملي کولو لپاره وروستي جزئیات نهایي کوي او د پلي کېدو بهیر یې پر مخ وړي.
هغه ویلي، د اوکرایني اسیرانو ژر تر ژره خپلو کورونو ته ستنېدل د اوکراين له لومړیتوبونو څخه دي.
اومېروف زیاته کړې، د اوکراین، امریکا او روسیې په درې اړخیزو خبرو کې د سولې د ټینګښت او له جګړې وروسته د اوکراین د بیارغونې پر موضوعاتو هم بحث شوی دی. نوموړي ویلي، لومړنی لومړیتوب د جګړې پای ته رسول او د اوکراین لپاره د امنیتي تضمینونو ترلاسه کول دي.
بلخوا، د روسیې د مذاکره کوونکي پلاوي مشر او د دغه هېواد د ولسمشر مرستیال مکینسکي د نومبر په ۱۱مه نېټه ویلي، چې د خبرو اترو په بهیر کې د اروپايي هېوادونو د ګډون په اړه د روسیې او اوکراین په دریځونو کې توپيرونه شته دي.
نوموړي ويلي، د روسیې پلاوي په ابوظبۍ کې له اروپايي استازو سره هېڅ ډول لیدنه او اړیکه نه ده لرلې او دا خبرې اترې یوازې د روسیې، امریکا او اوکراین ترمنځ په درې اړخیزه بڼه ترسره شوې دي.
