نيويارک ټايمز امريکايي ورځپاڼې د افغان ځواکونو د تلفاتو د لوړې کچې خبر ورکړی، خو ملي دفاع وزارت وايي، د نيويارک ټايمز راپور بې بنسټه دی.
د دغه وزارت ویاند غفور احمد جاوید وايي چې د افغان ځواکونو او په خاصه توګه د ملي اردو د مرګ ژوبلې په اړه د نیویارک ټایمز راپور دقیق نه دی.
جاويد ازادي راډيو ته ويلي: «زه د دفاع وزارت د ویاند په توګه چې خلکو او رسنیو ته د معلوماتو ورکړې مسوولیت لرم د نیویارک ټایمز راپور ردوم، موږ تل هغه معلومات چې له اصولو سره مطابقت ولري له خلکو او رسنیو سره شریک کړي دي».
تازه امریکايي چاپ نیویارک ټایمز ورځپاڼې په یوه راپور کې ویلي چې د تېرې مېلادي میاشتې په شلو ورځو کې شاوخوا څلور سوه افغان ځواکونه وژل شوي دي.
په دغه راپور کې همدا راز راغلي چې وژل شوي کسان دوی د افغانستان په شلو ولایتونو کې په مستند ډول ثبت کړي.
نیویارک ټایمز د ځینو سیمه ییزو چارواکو له قوله دا خبره هم کړې چې د حساسیتونو له کبله نه شي کولای د ځواکونو د مرګ ژوبلې دقیق معلومات له رسنیو سره شریک کړي.
دا په داسې حال کې ده چې تر دې وړاندې د افغانستان دفاع وزیر د مشرانو جرګې په یوه غونډه کې د ملي اردو پر مرګ ژوبلې اندېښنه ښودلې وه.
د امریکا دفاع وزارت هم ویلي چې د افغان ځواکونو د مرګ ژوبلې د مخنیوي لپاره ځینې اقدامات په پام کې لري، خو د دغو اقداماتو په اړه یې جزئیات نه دي ورکړي.
له دې ټولو سره سره د پوځي چارو کارپوهان بیا د افغان ځواکونو مخ پر زیاتېدونکې مرګ ژوبله د اندېښنې وړ بولي.
د پوځي چارو افغان کارپوه محمدا ګل مجاهد وايي: «دا چې په یوه میاشت کې څلور سوه وايي دا هم دروغ ده ځکه د مرګ ژوبلې کچه له دې هم زیاته ده، د نورو لاملونو تر څنګ د رهبرۍ په کچه بې کفایتي هغه عامل دی چې د مرګ ژوبلې د رامنځته کېدو سبب کېږي».
د مجاهد په خبره د افغان ځواکونو زیاته مرګ ژوبله د ځواکونو د روحیې د کمزوري کېدو سربېره د جګړې پر لومړیو کرښو هم بد اغېز کوي او باید ژر تر ژره د دې لړۍ مخه ونیول شي.
