حامد کرزي: امریکا په افغانستان کې د ترهګرو د ماتولو وړتیا نه لري

پخواني ولسمشر حامد کرزي په ترکیه کې د سولې په اړه په یوه جوړ شوي نړیوال کنفرانس کې ویلي، امریکا ددې وړتیا نه لري او بریالۍ نه شوه چې په افغانستان کې ترهګرې ډلې ماتې کړي. دده په وینا په افغانستان کې د امریکا د ماموریت ستره موخه دا وه، چې هلته به ترهګرې ډلې ماتوي، خو نه یوازې دا چې دغه ډلې ماتې نه شوې، نورې هم پياوړې شوې او مخامخ جګړې یې پيل کړې. دده په وینا په افغانستان کې د امریکا د اوږدې جګړې لوړه بیه افغانانو پرې کړې ده او هرې افغان کورنۍ ته دغه خونړۍ جګړه په لوړه بیه تمامه شوې ده. نوموړي همدا راز په دې کنفرانس کې د افغانستان او ترکیې ښو اړیکو ته اشاره کړې ده او ویلي یې دي چې ترکیه کولی شي له خپل نفوذ په استفادې د افغانستان په سوله او ثبات کې همکاري وکړي.