اندونیزیا: طالبان دې جګړه بس کړي، مذاکرات یې په ګټه دي

اندونیزیا به د افغان سولې په برخه کې خپلو هڅو ته دوام ورکړي. یادې څرګندونې د اندونیزیا ولسمشر جوکو ویدیدو له اجراییه رییس عبدالله عبدالله سره په لیدنه کې کړې دي. د اجراییه ریاست رسمي فیسبوک پاڼې له مخې، اجراییه رییس په دې لیدنه کې په اندونیزیا کې د وروستۍ زلزلې له امله د یاد هېواد له ولسمشر او خلکو سره خپله خواشیني او همدردي شریکه کړې ده. عبدالله په خپلو خبرو کې د افغان سولې په برخه کې د اندونیزیایي چارواکو له هڅو مننه وکړه او په دې برخه کې یې د هغوی پر رول ټینګار کړی دی. ویدیدو له اجراییه رییس نه د همدردۍ له امله مننه وکړه او زیاته یې کړه، چې هېواد یې په افغانستان کې د سولې او ثبات غوښتونکی دی او په دې برخه کې به خپلو هڅو ته دوام ورکړي. ویدیدو وویل ټول مسایل د خبرو او بحث له لارې د حل وړ دي. هغه له طالبانو وغوښتل چې له جګړو لاس واخلي او د خبرو له لارې دې خپلو موخو ته د رسېدو هڅه وکړي. په دې لیدنه کې دواړو لوریو پر دوه اړخیزو اقتصادي اړیکو د ټینګار تر څنګ پر یو لړ نورو دوه اړخیزو موضوعاتو هم خبرې کړې دي.