ټاکنیزو شکایتونو کمیسیون: یو شمېر نوماندان له وروستي لیسته باسو

د ټاکنیزو شکایتونو خپلواک کمیسیون وایي، په نږدې ورځو کې به د ولسي جرګې د نوماندانو له وروستي لیسته د یو شمېر کاندیدانو نومونه لرې کړي. یاد کمیسیون دا څرګندونې په داسې حال کې کوي، چې د ټاکنو په رانږدې کېدو د ولسي جرګې لپاره د نوماندانو تر منځ سیالۍ هم تر ټولو جدي پړاو ته داخلې شوې دي. د دې کمیسیون مرستیالې حمیرا حقمل وویل، چې ځینې نوماندان به د غیر مسووله وسله والو درلودلو، په دولتي دوایرو کې د فعالیت او د اسنادو د نه تکمیل له امله د نوماندانو له وروستي لیسته وباسي. هغې زیاته کړې دوی له هیچا ویره نه لري او د دوی پر وړاندې له موجودو ګواښونو سره سره به د ځینو نوماندانو نومونه له وروستي لیسته وباسي. وړاندې تر دې هم یاد کمیسیون ۳۵ نوماندان له وروستي لیسته ایستلي او ځینې نورو ته یې اخطارونه او توصیې ورکړې دي. د معلوماتو له مخې اوسمهال د ولسي جرګې راتلونکو ټاکنو ته ۲۵۶۵ کسانو ځانونه نوماند کړي، خو یاد کمیسیون دا نه دي ویلي چې له دې ډلې به څومره نوماندان له وروستي لیسته وباسي.