خلیلزاد به نن اسلام اباد ته ورسېږي

د پاکستان د کورنیو رسنیو په حواله، د افغانستان د سولې او پخلاینې لپاره د امریکا دبهرنیوچارو وزارت ځانګړی استازی، زلمي خلیل زاد به نن اسلام اباد ته ورسېږي. دا خبر د پاکستان ټوډې خبري سایټ پرون خپور کړ. د امریکا د بهرنیوچارو وزارت د اکټوبر په ۳مه ، په یوه بیان کې وویل چې زلمی خلیلزاد افغانستان، پاکستان، متحده عربي اماراتو، سعودي عربستان او قطر ته ځي. د خلیل زاد د لس ورځني سفر هدف په افغانستان کې د حکومت او طالبانو ترمنځ د سولې د مذاکرو په اړه له ټولو خواو سره خبرې دي. زلمی خلیل زاد د روان میلادي کال دسپټمبر په ۵مه نېټه هم د امریکا د بهرنیوچارو له وزیر پاکستان ته تللی و او د پاکستان ټوډې په حواله ، تېره اونۍ یې په واشنګټن کې د پاکستان د بهرنیو چارو له وزیر شاه محمود قریشي سره کتلي دي. د پاکستان د بهرنیو چارو وزارت اسلام اباد ته د خلیل زاد د سفر په اړه معلومات نه دي خپاره کړي.