په فراه کې د طابانو یو مهم قوماندان وژل شوی دی

د فراه په خاکسفېد ولسوالۍ کې د وسله والو طالبانو يو قوماندان حاجي باري جان له خپلو يو شمېر ملګرو سره وژل شوى دى. د فراه د امنيې قوماندانۍ ویاند محب الله محب وايي، باري جان تېره ورځ مازديګر د خاکسفېد ولسوالۍ اړوند په “دېوال سرخ” سیمه کې د بهرنیو ځواکونو په هوایي برید کې وژل شوى دى. هغه وايي چې په دغه بريد کې لس نور وسله وال طالبان هم وژل شوي او تر لسو ډېر نور ټپيان دي. محب زیاتوي چې تېره ورځ د يادې ولسوالۍ په ځینو سیمو کې د افغان او غوڅ ملاتړ ماموریت ځواکونو ځمکني او هوايي عمليات پيل شوي او تر اوسه روان دي. په فراه کې د طالبانو يوې سيمه ييزې سرچينې هم تاييد کړه چې د تېرې ورځې په بريد کې د هغوى يو قوماندان وژل شوى دى. دغه سرچينې په ياد بريد کې د نورو طالبانو د وژل کېدو په اړه څه نه دي ویلي.