ولسمشر غني: د هېواد شمال کې رواني ناامنۍ عمدي دي

ولسمشر غني د هېواد شمالي زون ته د خپل سفر پر مهال په یوه وینا کې ویلي، چې په شمالي زون کې ناامنۍ عمدي بڼه لري او دې زون ته د ناامنیو لېږد د دښمنانو یوه پخوانۍ تګلاره ده، چې په شمال کې د لویو دولتي پروژو او له منځنۍ اسیا سره د هېواد د اړیکو د تخریب په موخه جوړه شوې ده. غني د خپلې وینا پر مهال په بلخ کې د پولیسو د تشکیل په پراخېدو هم ټنګار کړی او زیاته کړې یې ده، چې ښاري پولیس له پخوا باید ډېر مسلکي او په منظمو پوځي تجهیزاتو سمبال واوسي. ولسمشر غني د خپلې وینا پر مهال دغه راز وویل، شمال د فاسیدینو او اوباشانو ځای نه دی او هغه څوک چې مفسد او اوباش وي باید شمال پرېږدي. غني د هېواد شمال ته د خپل سفر په دوهمه ورځ د بلخ ولایت له ولسوالانو، سوداګرو او دیني عالمانو سره پر امنیتي، سیاسي او تجارتي موضوعاتو هم خبرې کړې دي.