ایراني پلوو حوثیانو ویلي چې پر سعودي عربستان یې د بې پیلوټه الوتکو په وسیله برید کړی، خو سعودي عربستان ویلي چې دغه الوتکه یې ویشتلې ده.
د حوثي یاغي ډلې ویاند یحیی الساري ویلي، چې د بې پیلوټه الوتکو په دغه برید کې د جیزان او ابحا هوايي ډګرونه په نښه شوي دي.
دې ډلې ویلي چې دې بې پیلوټه الوتکې یې د ابحا پر هوايي ډګر یو کروز میزایل هم توغولی دی.
دا په داسې حال کې ده چې د سعودي په مشرۍ ائتلاف چې په یمن کې جګړه کوي، تېره ورځ اعلان وکړ چې د ابحا سیمه ییز هوايي ډګر ته نږدې یوه بې پیلوټه الوتکه یې ویشتلې او نسکوره کړې ده، خو د ائتلاف ویاند ډګروال ترکي المالکي په خپل بیان کې د حوثي ډلې ادعا ته اشاره نه ده کړې.
سعودي عربستان تایید کړې چې په دغه برید کې ۲۶ کسان ټپیان شوي دي.
په همدې حال کې د سعودي ولیعهد محمد بن سلمان ویلي چې د عمان په خلیج کې د تېلو پر دوو ټانکري بېړیو د پنجشنبې د ورځې حمله ایران کړې ده.
سلمان له شرقالاوسط ورځپاڼې سره په مرکه کې ویلي، ایران پر دې بېړیو چې یوه یې جاپانۍ وه، دا حمله داسې مهال وکړه چې د جاپان لومړی وزیر شینزو ابې په تهران کې و او د ده په خبره، ایرانیانو حتی د ابې د سفر درناوی هم ونه کړ.
هغه پر نړیوالې ټولنې غږ کړی چې د ایران پر وړاندې قاطع دریځ خپل کړي.
نوموړي زیاته کړې چې هېواد یې جګړه نه غواړي، خو د سعودي خلکو، ملي حاکمیت، ځمکنۍ بشپړتیا او ګټو ته د هر راز ګواښ پر وړاندې به لازم اقدام وکړي.
د سعودي ولیعهد پر سعودي عربستان د ایران پلوو حوثي یاغیانو د بې پیلوټه الوتکې وروستي برید ته هم اشاره کړې او ویلي یې دي چې د دې ډلې دا او مخکینۍ حملې د ریاض د هغې غوښتنې اهمیت تاییدوي، چې نړیواله ټولنه باید د ایران پر ضد قاطع دریځ ونیسي.
بلخوا د هغې ناروېژۍ بېړۍ عمله د متحده عربي اماراتو دوبۍ ښار ته رسېدلې، چې د عمان په خلیج کې چاودنه پکې وشوه او اور یې واخیست.
دا کښتۍ دری ورځې په ایران کې وه او یوه بله کښتۍ چې په هغه کې هم په همدې ورځ چاودنه شوې وه، د متحده عربي اماراتو سواحلو ته رسېدلې ده.
متحده ایالتونو پر دې کښتیو د حملې پړه پر ایران اچولې او ویلي یې دي چې د ایران سپاهپاسداران انقلاب ځواک ماینونه پکې ځای پر ځای کړي او الوځولې یې دي.
خو تهران دغه تورونه رد کړي او برعکس د ولسمشر ټرمپ اداره تورنوي چې د ایران له خوا د وېرې د خورولو کمپاین یې پیل کړی دی.
