د نړۍ پیاوړو هېوادونو په ویانا کې له ایراني چارواکو سره په غونډه کې دغه هېواد ته خبرداری ورکړی، چې د اټومي هوکړې شرايطو ته ژمن پاتې شي.
د برېټانيا، جرمني، چين، روسيې او فرانسې استازو د ايران له استازي سره په ويانا کې په دې تړاو مفصلې خبرې کړې دي.
دوى د ٢٠١٥ ز کال د اټومي تړون د شرايطو پر تطبيق بحث کړی چې د ايران د يورانيمو غني کول او ذخيره کول محدودوي.
د دغو شرايطو له مخې، د ځينو نړيوالو بنديزونو د لرې کېدو په بدل کې د ايران اټومي ظرفيتونه محدود کړاى شوي وو.
د نړۍ دغو پیاوړو هېوادونو په خپله غونډه کې ايران ته خبردارى ورکړی، چې د شوي اټومي تړون شرايطو ته ژمن پاتې شي.
د ايران د بهرنيو چارو وزارت معين عباس عراقچي په ويانا کې تر غونډې وروسته خبريالانو ته په خبرو کې ویلي، چې د تړون له غړو هېوادونو سره یې غونډه مثبته، خو کافي نه وه.
هغه ویلي: «موږ د ګډ کمېسيون اوږده غونډه درلوده چې تر دريو ساعتونو زيات يې دوام وکړ، په ټوله کې زه پر دې باور يم چې يوه مثبته او رغوونکې غونډه وه. مخکنيو غونډو ته په پام سره ويلاى شم چې دا يو بل ګام و، خو لا هم کفايت نه کوي، لا هم د ايران توقعات نه پوره کوي».
ایران ته د نړۍ د پیاوړو هېوادونو دغه خبرداری داسې مهال دی، چې د ايران لپاره د امريکا ځانګړي استازي براين هوک وړمه ورځ وويل چې واشنګټن به د تهران پر وړاندې خپل دريځ همداسې شدید وساتي.
براين هوک په لندن کې يوه کنفرانس ته ويلي، که د ايران له خوا هره حمله کېږي، په پوځي قوت به ځواب ورکړل شي.
هغه زیاته کړې: «موږ هڅه کوو چې د ايران پر وړاندې له زغمه کار واخلو. موږ دغه راز ځان په داسې موقف کې نيسو چې که د ايران له خوا راباندې بريد وشي، موږ يې په پوځي قوت ځواب ورکړاى شو، که راباندې حمله وشي، موږ به بالمثل وکړو، موږ په سيمه کې د ايران ګواښونو ته ځواب ويلى او دغه استخباراتي معلومات مو د نړۍ په بېلابېلو برخو کې له ډېرو خلکو سره شريک کړي، موږ په شدت سره دفاعي حالت خپل کړى دى، خو فکر کوو چې د زغم د بېرته اعادې لپاره هڅه کوو».
دا خبرداری داسې مهال دی چې د ایران او امریکا ترمنځ له کړکېچونو وروسته دغه هېواد ویلي وو چې نور ځان د ٢٠١٥ ز کال د اټومي تړون د ټولو شرايطو په رعايتولو مکلف نه ګڼي.
ايران ويلي چې نږدې دى چې د خپلو غني شويو يورانيمو اندازه تر ٣٠٠ کيلوګرامو واړوي، دا هغه اندازه ده چې د اټومي تړون له خوا ورته حد ټاکل شوى و.
وروسته له هغې چې د امريکا متحده ايالتونو له ایران سره د شوي اټومي تړون د وتلو او پر ايران د بنديزونو د بيا لګولو اعلان وکړ، د دواړو لوريو ترمنځ کړکېچ اوج ته ورسېد.
