اروپایي ټولنې ویلي، اروپایان د ایران د ۲۰۱۵ ز کال له اټومي تړونه د ایران سرغړونه ډېره جدي نه بولي.
د دوی په خبره، ایران د ۲۰۱۵ ز کال له اټومي تړونه داسې لویه سرغړونه نه ده کړې، چې د دغه تړون د عملي کېدو خنډ شي.
د اروپایي ټولنې د دغو څرګندونو اشاره د ایران له لوري د یورانیمو د بډاینې د کچې لوړېدو ته وه چې د دغه تړون پر خلاف یې دا ګام اخیستی دی.
د اروپایي ټولنې د بهرنۍ پالیسۍ مشرې فېډریکا موګرېني ویلي، چې د دغه تړون اروپایي لاسلیک کوونکي هېوادونه اوسمهال نیت نه لري چې د دغه تړون د اختلافاتو د حل لپاره یوه تګلاره رامنځته کړي.
موګرېني وړمه ورځ په بروکسل کې د اروپایي ټولنې د بهرنیو چارو وزیرانو تر غونډې وروسته خبریالانو ته ویلي، چې له ایران سره د دغه تړون د بشپړ خوندیتوب لپاره یې ښه بحثونه کړي دي.
نوموړې زیاتې کړې: «موږ ټول هغه اقدامات چې له بده مرغه د ایران له لوري شوي، ومو لیدل او ومو ارزول او له ایرانه مو وغوښتل چې بېرته د دې تړون بشپړ عملي کېدو ته ور وګرځي، غواړو واضح ووایم، ټول هغه تخنیکي اقدامات چې شوي، د بېرته راګرځېدو وړ دي».
په بروکسل کې د اروپایي ټولنې د بهرنیو چارو وزیرانو یاده غونډه په همدې موخه جوړه شوې وه چې د امریکا او ایران تر منځ تر وروستیو لانجو وروسته د ایران د اټومي تړون د خوندیتوب لپاره لارې چارې ولټوي.
دا په داسې حال کې ده چې امریکا په ۲۰۱۸ ز کال کې له دغه تړونه ووتله او پر ایران یې نور بندیزونه ولګول.
د دغه تړون له مخې، ایران اجازه لري چې ۳۰۰ کیلوګرامه یورانیم تر ۳،۶۷ درجې غلضت پورې بډای کړي.
په همدې حال کې د برېټانیا د بهرنیو چارو وزیر جرمي هنټ ویلي، چې لاهم د دغه تړون د خوندیتوب لپاره وخت شته.
نوموړي زیاته کړې، سره له دې چې امریکا او برېټانیا نږدې متحدین دي، خو لندن له ایران سره د بحران په مخته وړلو کې له متحده ایالتونو سره موافق نه دی.
د اروپایي ټولنې تر دې غونډې وړاندې د ایران ولسمشر حسن روحاني ټینګار کړی و چې هېواد یې له امریکا سره خبرو ته حاضر دی، خو په دې شرط چې امریکا پر تهران بندیزونه پای ته ورسوي، خو د امریکا د بهرنیو چارو وزیر د ایران د ولسمشر دغه وړاندیز رد کړی دی.
مایک پامپیو وړمه ورځ واشنګټن پوسټ ورځپاڼې ته ویلي چې دا هغه وړاندیز دی چې حسن روحاني د امریکا پخواني ولسمشر بارک اوباما او د بهرنیو چارو وزیر جان کیري ته هم کړی و.
