د امریکا د مرکزي قوماندانۍ مشر جنرال جوزېف ډانفورډ خبرداری ورکړی چې په منځني ختیځ کې لاهم د داعش وسله والې ډلې ګواښونه پر ځای پاتې دي.
نوموړي چې د عراق په پلازمېنه بغداد کې یې د امریکا پر مشرۍ د داعش پر وړاندې ائتلاف قوماندانانو ته خبرې کولې، خبرداری ورکړی، سربېره پر دې چې داعش په عراق او سوریه کې ځپل شوی، خو لا هم په سیمه کې د دې ډلې ګواښونه پر ځای پاتې دي.
ډانفورډ ویلي چې سربېره پر دې چې د داعش خلافت د ائتلاف د ځواکونو له لوري له منځه وړل شوی، خو لاهم په سیمه کې د دې ډلې اېډیالوژي حاکمه ده او که مخنیوی یې ونه شي، سیمه به یو ځل بیا له جدي ګواښونو سره مخ شي.
نوموړي دغه راز هلته مېشتو امریکایي ځواکونو ته ویلي چې د دوی د ماموریت پر وړاندې لاهم خنډونه شته او دوی باید هره شېبه د سخت وضعیت کابو کولو ته تیاری ولري.
نوموړي دغه راز په بغداد کې خبریالانو ته ویلي: «موږ د داعش پر وړاندې په هغو لاسته راوړنو چې له ۲۰۱۵ ز کال څخه وروسته مو درلودې، ویاړو، له دې ډلې مو لوی مرکزونه لکه، رقعه، موصل او فلوجه ونیول، خو دا په دې مانا نه ده چې په سیمه کې د دې ډلې ګواښ په پوره توګه له منځه تللی دی».
دا په داسې حال کې ده چې داعش ډلې د لومړي ځل لپاره په ۲۰۰۶ ز کال د عراق په ځینو لرې پرتو سیمو کې خپل فعالیتونه پیل کړل او ډېر ژر یې په دغه هېواد کې ځینې د دولت خلاف وسله والې ډلې له ځان سره یوځای کړې.
یادې ډلې په ۲۰۱۴ ز کال کې د عراق په څو ښارونو کې خونړي بریدونه پیل کړل او ډېرې سیمې یې تر خپلې ولکې لاندې راوستې، چې ورسره سم د امریکا په مشرۍ لوېديځو هېوادونو د دغه ډلې د فعالیتونو د کابو کولو لپاره هوایي ائتلاف رامنځته کړ او دغه ډله یې د عراق له ځینو ښارونو په شاتمبولو ته اړ کړه.
