د امریکا د استخباراتو مشر نور له ټرمپ سره کار نه کوي

د امریکا د استخباراتو مشر د ټرمپ له ادارې وځي. د امریکا د ملي استخباراتو مشر ډان کوټس بل لوړپوړی چارواکی دی چې د ټرمپ له ادارې وځي. ولسمشر ډونلډ ټرمپ په یوه ټويټ کې ليکلي چې کوټس به د اګست په نيمايي کې دنده پرېږدي او هغه به په کانګرس کې د تکزاس استازی جان راټکلېف دغې څوکۍ ته غوره کړي. د ولسمشر ټرمپ او کوټس تر منځ وخت ناوخت د روسیې او شمالي کوریا پر سر د نظر اختلافونه وو. کوټس په خپل استعفاليک کې ویلي چې د امریکا استخباراتي ټولنه په تېرو دوه نیمو کلونو کې تر پخوا ډېره پياوړې شوې. کوټس په فبرورۍ مياشت کې ویلي وو، ولسمشر ترې غوښتي چې په خپل پوست کې پاتې شي، خو بیا هم ښکارېده چې د بهرني سیاست په دوو برخو کې د دوی اختلاف دوام درلود. هغوی د امریکا په ټاکنو کې د روسیې د لاسوهنې، د ایران د اتومي پروګرام او له شمالي کوریا سره د اړيکو ښه کولو لپاره د ښاغلي ټرامپ د هڅو پر سر اختلاف درلود.