د هند امنیتي چارواکو ویلي، داسې شواهد یې موندلي چې وسله والو کسانو چې د پاکستان پوځ یې ملاتړ کوي، په کشمیر کې د هندوانو په یوه عبادت ځای د برید پلان جوړ کړی و.
دا په داسې حال کې ده چې د روان میلادي کال د فبرورۍ په څوارلسمه په هندي کشمیر کې د هند د پولیسو پر یوه موټر چاودنه وشوه چې له ۴۰ زیات هندي ملېشه پولیس پکې ووژل شول، چې له هغه وروسته د هند او پاکستان ترمنځ کړکېچ لا زیات شو.
د رویټرز خبري اژانس په حواله، هندي چارواکي وايي چې وسله والو کسانو پلان جوړ کړی و چې د امرنات په غار کې چې د هندوانو لپاره ډېر سپېڅلی ځای دی او هر کال زرګونه هندوان د عبادت لپاره ورځي، چاودنه وکړي.
د چارواکو په خبره، د چاودېدونکو موادو په هغه بسته کې چې موندل شوې، داسې ماینونه هم شامل وو چې د پاکستان ساخت نښه ورباندې لګول شوې وه.
رویټرز خبري اژانس وايي، د هند تر واکمنۍ لاندې کشمیر کې حکومت امر کړی چې د امرنات غار ته د عبادت لپاره د زیارت کوونکو تګ بند شي او پر هغو کسانو چې وار له مخه هلته ورغلي، امر وشو چې خپلو کورونو ته ستانه شي.
د جامو او کشمیر حکومت ویلي چې دا اعلان يې د استخباراتي معلوماتو پر بنا کړی دی.
د هند د پوځ یوه جنرال «ک. ج. اس دیلون» په سرینګر کې خبریالانو ته ویلي: «پر ماینونو د پاکستاني فابریکو نښان په وضاحت دا څرګندوي چې د پاکستان پوځ په کشمیر کې په ترورېزم کې لاس لري».
د پاکستان پوځ او یا د بهرنیو چارو وزارت تر اوسه د هند د دغې ادعا په اړه څه نه دي ویلي. خو د پاکستان حکومت تر دې وړاندې بیا بیا د سیمې په کچه په تروريستي فعالیتونو کې لاس لرل رد کړي دي.
د پاکستان حکومت وايي چې په دې وروستیو کې یې د تروریستي ډلو پر وړاندې ځینې عملې اقدامات هم کړي دي.
دغه هېواد وايي چې په تازه اقدام کې یې د لشکر طیبه ډلې مشر حافظ سعید نیولی دی.
حافظ سعید تورن دی چې د هند پر ممبی ښار په ۲۰۰۸ میلادي کال کې د تروريستي بریدونو اصلي پلان جوړوونکی و. هغه مهال په یاد برید کې ۱۶۶ تنه وژل شوي او ډېر نور زخمیان شوي وو.
