د سولې خبرو تر لغوه کېدو وروسته، وسله والو طالبانو په کابل او پروان کې دوه ځانمرګي بریدونه وکړل. په دغو بریدونو کې تر ډېره ملکي وګړي ووژل شول او پړه یې وسله والو طالبانو ومنله. په ورته وخت کې امریکا، جرمني او ملګرو ملتونو دغه بریدونه په کلکو ټکو غندلي دي او په خبره یې، په جګړه کې د ملکي وګړو ژوند ته ګواښ جوړول بشري جنایت دی.
تېره ورځ د پروان په مرکز چاریکار ښار کې د ولسمشر غني د ټاکنیز کمپاین غونډه جوړه شوې وه. د غونډې لپاره سخت امنیتي تدابیر نیول شوي وو او زرګونو کسانو په کې ګډون کړی و. له سختو تدابیرو سره سره، ځانمرګي بریدګر دغه غونډه په نښه کړه او نږدې ۶۸ ملکیانو ته یې مرګ ژوبله واړوله. د پروان ولایت ځایي چارواکي وايي چې ځانمرګی بریدګر په موټرسایکل سپور و او د خلکو په ګڼه ګوڼه کې یې په ځان پورې تړلو چاودېدونکو توکو ته چاودنه ورکړه. کورنیو چارو وزارت په یوه خبرپاڼه کې وویل، چې غرمه مهال په پروان کې ځانمرګی برید شوی دی او په پېښه کې د څلورو نظامیانو په ګډون، ۲۶ کسه وژل شوي او ۴۲ نور ټپیان دي. د کورنیو چارو وزارت ویاند نصرت رحیمي مسیر ورځپاڼې ته وویل، چې په وژل شوو او ټپیانو کې ملکي وګړي هم شامل دي.
بلخوا له دې پېښې څه باندې یو ساعت وروسته په کابل کې هم ځانمرګی برید وشو. برید د کابل ښار د نهمې امنیتي حوزې په مربوطاتو کې د احمدشا مسعود له څلور لارې سره د ملي دفاع وزارت پېژنتون ته نږدې وشو. کورنیو چارو وزارت د پېښې د تایید تر څنګ وايي، چې په پېښه کې د شپږو نظامیانو په ګډون، ۲۲ ملکیان وژل شوي او ۳۸ نور ټپیان دي. دغه برید په داسې یوه سیمه کې شوی چې د ملکي وګړو ګڼه ګوڼه پکې ډېره وي او شاوخوا ته یې لسګونه استوګنیز کورونه هم شته دي. وسله والو طالبانو د یادو دواړو بریدونو مسوولیت منلی دی.
کورنیو چارو وزارت بیا د یوې خبرپاڼې په خپرولو سره ویلي چې وسله والو طالبانو بشري جنایت تر سره کړی دی او د عامو وګړو په منځ کې یې چاودنې کړې دي. دغه وزارت وايي، د یادو پېښو له عاملینو د عامو وګړو غچ اخلي.
له دې سره هممهاله ولسمشر غني هم یاد بریدونه غندلي دي. د ارګ له مطبوعاتي دفتره په خپره شوې خبرپاڼه کې راغلي چې وسله والو طالبانو د عامو افغانانو په وژلو یو ځل بیا جنایت تر سره کړ. د ده په خبره، د هغو کسانو وژل چې د ولسواکۍ لپاره را ټول شوي دي او ټول عام افغانان دي، بشري جنایت دی او نړیوال یې باید پر وړاندې اقدام وکړي.
د افغانستان لپاره د جرمني ځانګړي استازي مارک پوتزل هم په پروان کې د ولسمشر غني پر ټاکنیز کمپاین د وسله والو طالبانو برید په کلکو ټکو غندلی دی. هغه ویلي چې طالبانو نه یوازې پر عامو افغانانو برید کړی؛ بلکې د هر افغان پر هغو حقونو یې برید کړی، چې دوی یې د ولسواکۍ د تامین لپاره د قانون په چوکاټ کې لري.
په کابل کې د ملګرو ملتونو مرستندویه دفتر یا یوناما هم د طالبانو برید غندلی دی او هغه یې جنایت بللی دی. دغه ادارې ویلي چې د ښکېلو لورو لخوا د ملکي وګړو وژل او په نښه کول نه بښل کېدونکی بشري جنایت دی او د جګړې ټولو لورو ته پکار ده چې د عامو افغانانو د ژوند خوندیتابه ته جدي پاملرنه وکړي.
