ولسمشر غني: داعش ډله به د ننګرهار له شینوارو ورکوو

ولسمشر غني ویلي چې داعش ډله به د شینوارو له سیمې ورکوي. ولسمشر غني چې هسکې مینې ولسوالۍ ته تللی د تېرې جمعې د پېښې له قربانیانو سره یې کتلي دي. نوموړي په دغه ولسوالۍ کې په جوړه شوې غونډه کې د خبرو پر مهال ویلی چې دداعش وسله وال به په بشپړه توګه د شینوارو له سیمې ورکېږي او ددغه ولسوالۍ لپاره به منظم پراختیایي پلانونه جوړېږي. ولسمشر همدا راز د هسکې مینې او د شینوارو له ولسونو مننه کړې چې د نړیوالې ترهګرۍ پر ضد مبارزه کې یې قربانۍ ورکړې دي او دغه ډلې یې ماتې کړي دي. ټاکل شوې چې ولسمشر غني به د پېښې له زیانمنو کورنیو سره د نقدي مرستو ژمنه هم وکړي. تېره جمعه د لمانځه پر مهال په هسکه مېنه کې په یوه جومات کې چاودنه وشوه. په پېښه کې تر ۷۳ پورې کسان ووژل شول. دغه خونړۍ پېښه د نړۍ په کچه وغندل شوه او ټولو نه بښل کېدونکی بشري ضد جنایت وباله.