سعودي: ایران دې په سیمه کې خپل کړه وړه عادي کړي

د سعودي د بهرنیو چارو وزیر عادل الجبیر ویلي، د یاد هېواد پر تیلي تاسیساتو برید کې ایران لاس لري. هغه زیاته کړې، دوی تر څېړنو وروسته دې پایلې ته رسېدلي، کومې وسلې چې په یاد برید کې ترې استفاده شوې ایرانۍ دي او دوی به د یاد هېواد د دې تېري پر وړاندې چوپ پاتې نه شي. الجبیر ویلي، دوی جګړه نه غواړي خو ایران ته به ددې ډول ورانکاره او تروریستي اعمالو اجازه ورنه کړي. هغه ویلي، ایران باید په دې پوه شي چې دا کړنې یې په ګټه نه دي او په سیمه کې باید خپل کړه وړه عادي کړې ګنې دروند پور به یې پرې کړي. دا په داسې حال کې ده چې څه موده وړاندې د سعودي پر تیلي تاسیساتو هوایي بریدونه وشول او د امریکا په ګډون ځینې نورو هېوادونو ایران په دې برید کې په لاس لرلو تورن کړ خو ایران په وار وار دا تورونه رد کړي دي.