د ترکیې ولسمشر رجب طیب اردوغان خبرداری ورکړی چې که د امریکا متحده ایالتونه د سوریې له شماله د کردي ځواکونو د وتلو په تړاو خپلې ژمنې عملي نه کړي، په سوریه کې به بیا پیاوړي عملیات پیل کړي.
نوموړي تېره ورځ روسیې ته تر خپل سفر وړاندې ویلي چې په سوریه کې یې اوسمهال پوځي عملیات د دې لپاره درولي، چې هلته مېشت خلک له سیمې ووځي.
نوموړي په انقره کې یوې خبري ناستې ته ویلي چې هېواد یې د سوریې ځمکنۍ بشپړتیا ته درناوی لري، خو ټینګار یې کړی چې د دغه هېواد په شمال کې به د ده په خبره، د ترهګرو په له منځه وړلو کې په ګډه کار وکړي.
هغه دغه راز زیاته کړې چې د روسیې له ولسمشر ویلادیمیر پوتین سره به د نورو مسایلو تر څنګ، د سوریې د اساسي قانون د کمېټې پر سر هم خبرې وکړي.
اردوغان خبرداری ورکړی چې هېواد به یې هېچا ته اجازه ورنه کړي چې د ترکیې پولو ته نږدې ترهګریزې کړنې وکړي. هغه ویلي: «هغوی(کردان) غواړي چې د سوریې په شمال کې د ترهګریزو کړنو لپاره مرکزونه جوړ کړي، خو موږ به دوی ته هېڅکله هم اجازه ور نه کړو».
د ترکیې ولسمشر دغه راز ویلي، چې هېواد یې په په سوریه کې د تلپاتې سوله غوښتونکی دی، نه داسې سوله چې د هغه په خبره یوازې د یوې لنډې مودې لپاره وي.
اردوغان په سوریه کې د کردانو پر وړاندې د پیل شویو عملیاتو په تړاو یوې پوښتنې ته په ځواب کې ویلي: «ترهګرو ته ورکړل شوی وخت پای ته رسېدلی دی، زموږ عملیات به په دې سیمه کې تر هغې روان وي، څو چې دوی له سیمې نه وي په شا شوي، دوی اوس له سیمې د وتلو په حال کې دي او تر دې دمه یې یوه لویه برخه وتلي هم دي».
نوموړي د ایران د وروستیو څرګندونو په تړاو هم ویلي، چې تهران، مسکو او انقرې د سوچې په ناسته کې له یو بل سره په دې برخه کې د همکارۍ ژمنه کړې وه، خو د دغه هېواد اوسنۍ څرګندونې ناسمې او د ژمنې خلاف دي.
په ورته وخت کې روسیې ویلي چې په سوریه کې د ترکي سرتېرو د عملیاتو او پاتې کېدو په تړاو باید انقره له دمشق سره هوکړې ته ورسېږي.
د روسیې د حکومت ویاند دیمیتري پېسکوف زیاته کړې: «دا د سوریې د حکومت حق دی چې په خپله خاوره کې د ترکیې د عملیاتو په اړه تصمیم ونیسي».
