د امریکا کانګرېس هغه پلټنې چې ایا د ولسمشر ټرمپ اقدامات له اساسي قانون سره په تضاد کې دي او کېدای شي پر اساس یې نوموړی استیضاح شي، روانه اونۍ پر سپینې ماڼې متمرکزې شوې دي.
په کانګرېس کې ډیموکراتانو له څه مودې راهیسې هڅې پیل کړې چې ولسمشر ټرمپ استیضاح کړي.
په دغه څېړنه کې چې د امریکا د کانګرېس د استازو جرګې د دریو کمېټو لخوا پر مخ وړل کېږي، د ملي امنیت شورا دری پخواني او اوسني چارواکي چې تر ټولو مهم پکې ټیم مورېسن دی، په نښه شوي.
د یادونې ده چې مورېسن د روسیې او اروپا په چارو کې د ولسمشر ټرمپ جګپوړی سلاکار دی.
نوموړی به د سپینې ماڼۍ لومړنی برحاله چارواکی وي چې د راتلونکې پنجشنبې په ورځ د تړلو دروازو ترشا په یوه استماعیه غونډه کې ګډون کوي.
د استازیو جرګې د بهرنیو اړیکو، استخباراتو او د څار کمېټې هڅه کوي چې دا معلومه کړي چې ایا ولسمشر ټرمپ له خپلې دندې او صلاحیتونو د ځان په ګټه او سیاسي اهدافو لپاره استفاده کړې او که نه؟
مورېسن به چې ګومان کېږي د اوکراین له ولسمشر سره د ټرمپ د ټلیفوني مکالمې په وخت حاضر و، لومړنی کس وي چې په دې استماعیه غونډه کې برخه اخلي او په دې اړه معلومات ورکوي.
دا په داسې حال کې ده چې ټرمپ له خپل اوکرایني سیال ویلادیمیر زیلېنسکي څخه په ټلیفوني مکالمه کې له هغه غوښتي وو، چې د پخواني مرستیال ولسمشر جوبایډن په اړه چې د ولسمشرۍ په راتلونکو ټاکنو کې د هغه یو مهم احتمالي سیال ګڼل کېږي، څېړنه وکړي.
د راپورونو له مخې، جوبایډن هغه مهال له دندې په اوکراین کې د خپل زوی لپاره د سوداګرۍ چارو لپاره ناوړه استفاده کړې وه.
امریکایي جګپوړي ډیپلومات ویلیام ټایلر چې اوس په اوکراین کې دنده تر سره کوي، د اکټوبر په ۲۲مه په استماعیه غونډه کې د مورېسن نوم اخیستی و او ویلي یې وو چې هغه د ټرمپ د خبرو شاهد و چې هڅه یې کړې وه، څو د اوکراین پر ولسمشر فشار راوړي چې که یې غوښتنه پر ځای نه کړي، نو پرکیف به شاوخوا ۴۰۰ میلیونه ډالره مرسته بنده کړي.
په نورو چارواکو کې د ملي امنیت د پخواني سلاکار جان بولټن مرستیال چارلس کوپرمن دی. د راپورونو له مخې، کوپرمن له دې مخکې د کانګرېس یوې کمېټې ته په څرګندونو کې د ټرمپ اقدامات تر پوښتنې لاندې راوستي وو.
خو تر اوسه دا نه ده څرګنده چې ایا کوم چارواکی یا ټول چارواکي به په استماعیه غونډه کې ګډون وکړي، ځکه ټرمپ ژمنه کړې چې د دې پلټنې مخه به ونیسي.
