د امریکا متحده ایالتونو دفاع وزیر مارک ایسپر ویلي، د البغدادي په وژل کېدو سره په سوریه کې جګړه نه ختمېږي.
هغه زیاته کړې: «د البغدادي مړینه به نړۍ له تشدده خلاصه نه کړي او نه به په سوریه کې جګړه ختمه شي، خو یقیناً هغو کسانو ته پیغام رسوي چې د امریکا عزم تر پوښتنې لاندې راولي او هغو وېره اچوونکو ته چې فکر کوي پټېدای شي، خبرداری ورکوي».
ایسپر دغه راز زیاته کړې، سره له دې چې داعش وسله وال له الهام بښونکي مشر څخه بې برخې شول، خو په سوریه کې امنیتي وضعیت لا هم پېچلی دی او د هغه مړینه به هلته روان کړکېچ پای ته ونه رسوي.
نوموړي زیاته کړې، امریکایي ځواکونه به په ستراتېژیک موقعیت کې پاتې شي، څو د اسلامي دولت ډله پرې نږدې چې د سوریې په شمال- ختیځ کې د تېلو مهمې زېرمې لاسته راوړي.
د امریکا دفاع وزیر ویلي، د هرې هغې ډلې پر وړاندې به له سخت پوځي ځواکه کار واخلي، چې د دغو زېرمو امنیت وګواښي.
بلخوا د امریکا یوه بل لوړپوړي پوځي چارواکي ویلي، چې د ځانګړو ځواکونو په هغو عملیاتو کې چې د داعش ډلې مشر ابوبکر البغدادي پکې ووژل شو، د دغې ډلې دوه نور مهم کسان هم نیول شوي دي.
د امریکا د لویو درستیزانو د کمېټې مشر مارک میلي له دفاع وزیر مارک ایسپر سره په یوه ګډه خبري غونډه کې ویلي، دا دوه کسان د دوی په توقیف کې دي.
که څه هم میلي د دغو دوو کسانو هویت او له البغدادي سره د هغوی اړیکې نه دي افشا کړې، خو زیاته کړې یې ده چې دواړه د داعش ډلې کلیدي غړي دي.
هغه ویلي: «امریکایي ځواکونو البغدادي داسې مهال چې په یوه تونل کې پټ شوی و، وموند. عملیاتي ځواکونه البغدادي ته ورنږدې شول او عملیات هغه مهال پای ته ورسېدل چې البغدادي خپل انتحاري واسکټ والوزاوه».
د یادونې ده چې د امریکا ولسمشر ډونالډ ټرمپ د یکشنبې په ورځ (اکټوبر ۲۶مه) اعلان وکړ چې د دغه ځانمرګي واسکټ په چاودلو سره البغدادي او د هغه دری ماشومان ووژل شول.
د امریکا متحده ایالاتو ویلي چې د ابوبکر البغدادي پر وړاندې عملیاتو کې هېڅ امریکايي سرتېري ته زیان نه دی رسېدلی.
بلخوا د بغدادي پّه وژل کېدو سره پر امریکا او ملګرو ملتونو سربېره، د نړۍ د ډېرو هېوادونو او بنسټونو مشرانو خوښي ښودلې او دا یې د ترهګرۍ پر وړاندې د مبارزې په برخه کې لویه لاسته راوړنه بللې ده.
