د امریکا د بهرنیو چارو وزیر مایک پامپیو په یوه اعلامیه کې ویلي، د عراق حکومت باید د لسګونو زرو عراقي اعتراض کوونکو مشروع غوښتنې واوري.
پامپیو ویلي: «متحده ایالتونه به د عراق د حکومت د ټولو هغو جدي هڅو ملاتړ وکړي چې په عراقي ټولنه کې موجودې ستونزې هوارې کړي».
د امریکا د بهرنیو چارو د وزارت په خبرپاڼه کې د پامپیو له قوله پر دې ټینګار شوی چې بغداد باید د هغو زرګونو کسانو مشروع غوښتنو ته غوږ کېږدي چې د خپل اواز د پورته کولو په خاطر سړکونو ته راوتلي دي.
تر اوسه پورې د عراق د حکومت پر ضد دې اعتراضونو کې د تاوتریخوالي له کبله ۲۶۰ کسان وژل شوي دي.
اعتراض کوونکي اداري فساد، بېکارۍ، د لومړنیو خدمتونو نشتوالي او د عراق په چارو کې د ایران لاسوهنې غوسه کړي دي.
دا لاریونونه چې د څو اونیو راهیسې روانې دي، د جمعې په ورځ یې په ترڅ کې لسګونه زره عراقیان د بغداد په مرکز کې راټول شوي وو.
دغلته لږترلږ ۳۵۰ کسان هغه مهال ټپیان شول چې پولیسو د اعتراض کوونکو د خورولو لپاره اوښکې بهوونکی ګاز او ربړي ګولۍ وکارولې.
د امریکا د بهرنیو چارو وزارت له ټولو خواوو غوښتي چې له تاوتریخوالي دې ډډه وکړي او زیاته کړې یې ده چې عراقي وګړي د رښتیني انصاف او حساب ورکولو مستحق دي.
د پامپیو په وینا، د اکټوبر په پیل کې د شوي تاوتریخوالي په اړه د حکومت څېړنې کافي اعتبار نه درلود.
د امریکا د بهرنیو چارو د وزیر په وینا، د عراق د ولسمشر بهرام صالح وروستي اقدامات چې د بیان او رسنیو پر ازادۍ جدي محدویتونه لګوي، باید نرم شي.
بلخوا د بښنې نړیوال سازمان ویلي چې په بغداد کې امنیتي ځواکونو د پوځي کچې اوښکې بهوونکي ګاز او لاسي بمونه پر ګڼه ګوڼه ورغورځولي چې ډېری کسان پکې ټپیان شوي دي.
د بښنې د نړیوال سازمان په وینا، د اعتراضونو د یوې څپې پر مهال نښه ویشتونکو اعتراض کوونکي پر سر او سینو په ډزو ویشتلي چې تر یوې اونۍ په کمه موده کې یې په ترڅ کې ۱۵۰ کسان وژل شوي.
د راپورونو له مخې، په دې اعتراضونو کې تر ۱۲زرو زیات کسان ټپیان شوي هم دي.
په اکټوبر میاشت کې عراقي پوځ ومنله چې د اعتراضونو د پیل پر مهال یې له حده زیات ځواک کارولی او دا یې هم وویل چې د هغو قومانده ورکوونکو افسرانو سره به حساب وکړي چې ناسم اقدامات یې کړي دي.
د عراق ولسمشر برهام صالح تر دې مخکې د معترضانو پر وړاندې تاوتریخوالی غندلی او د اکټوبر په اوومه یې په ټلوېزیوني وینا کې د اداري فساد او خلکو ته د کار د ښو فرصتونو د پیدا کولو په برخو کې د یو لړ تدابیرو اعلان وکړ، خو دې اعلان اعتراض کوونکي قانع نه کړی شول.
