ملا فضل الرحمن یوازې په اسلام اباد کې خپل لاریون ختم کړ

پاکستاني ملا فضل الرحمن د عمران خان پر خلاف خپل لاریون په اسلام اباد کې پای ته ورساوه خو په خبره یې په نورو ځایونو کې به خپل لاریون لا قوي کړي. فضل الرحمن خپلو پلویانو ته د خبرو پر مهال ویلي چې یو شمېر کړۍ د دوی د لاریونونو په تخریب پسې دي نو ځکه دوی پرېکړه کړې چې له اسلام اباد په شا شي او په نورو ښارونو کې خپلو لاریونونو ته ادامه ورکړي. ملا فضل الرحمن له عمران خان غوښتي وو چې په څو ورځو کې له خپلې دندې استعفا ورکړي خو هغه یې تر اوسه غوښتنه نه ده منلې او له لاریون کوونکو یې غوښتي چې خپل لاریونونه پای ته ورسوي. ملا فضل الرحمن ټینګار کړی چې د خپلو غوښتنو تر پوره کېدو پورې به له لاریونونو لاس په سر نه شي.