د امریکا له مخالفتونو سره سره، فرانسې، برېټانیا او جرمني ويلي چې شپږ نور اروپايي هېوادونه هم له هغه سیسټم سره یوځای شوي، چې دوی جوړ کړی او پر اساس یې شرکتونو ته اجازه ورکول کېږي، بې له دې چې پر ایران د امریکا له بندیزونو سرغړونه وشي، له دغه هېواد سره راکړه ورکړه وکړي.
یادو دریو هېوادونو په یوه ګډه اعلامیه کې ویلي، په اینسټېکس (INSTEX) سیسټم کې د ګډون لپاره د بلجیم، ډنمارک، فنلنډ، هالنډ، ناروې او سویډن د پرېکړې هرکلی کوي.
اینسټېکس له ایران سره د سوداګریزو مالونو د راکړې ورکړې نوى سیسټم دى.
دغه سيسټم اوس سوداګریزو شرکتونو ته اجازه ورکوي چې له ایران سره د جنس په بدل کې د جنس معامله وکړي.
په ورته وخت کې د امریکا متحده ایالتونو د دغه سیسټم کلک مخالفت کړی او د دغه هېواد مرستیال ولسمشر مایک پېنس ویلي، هغه وخت راغلی چې د امریکا اروپايي شریکان د ایران د وژونکي انقلابي رژیم پر ضد د امریکا د بندیزونو زیانمنول پای ته ورسوي.
اینسټېکس سيسټم چې مقر يې په پاريس کې دى، موخه يې د سوداګریزې راکړې ورکړې ملاتړ دى او پر اساس یې شرکتونو ته اجازه ورکول کېږي، بې له دې چې پر ایران د امریکا له بندیزونو سرغړونه وشي، له دغه هېواد سره سوداګریزه راکړه ورکړه وکړي. دغه ځانګړى مالي سيسټم ايران ته اجازه ورکوي، چې خپل تېل وپلوري او په بدل کې يې له نورو هېوادونو توليدات او خدمات وارد کړي او ايران به د دغه سیسټم له مخې، تر ډېره د امريکايي ډالرو پر ځاى د سوداګریزو مالونو د راکړې ورکړې همدغه سيسټم کاروي.
تازه فرانسې، برېټانیا او جرمني ويلي چې شپږ نور اروپايي هېوادونه هم له دغه سیسټم سره یوځای شوي دي.
دغو دریو هېوادونو ويلي، دوى د بلجيم، ډنمارک، فنلنډ، هالنډ، ناروې او سويډن د حکومتونو د پرېکړې هرکلى کوي، چې غواړي له اینسټېکس سيسټم سره يوځاى شي.
په اعلاميه کې ويل شوي، د سوداګریزو مالونو د راکړې ورکړې له دغه سيسټم سره د نورو هېوادونو يوځاى کېدل، اینسټېکس سيسټم او اروپايي هڅې لا پياوړې کوي چې د اروپا او ايران تر منځ په مشروع تجارت کې اسانتيا راولي.
د فرانسې، برېټانيا او جرمني د بهرنيو چارو وزيرانو چې کله په جنورۍ مياشت کې دغه پلان اعلاناوه، ويلي یې وو: «دغه پلان پر هغو ساحو تمرکز کوي، چې د امريکا بنديزونو نه دي په نښه کړې او تر ډېره به له هغو سکټورونو سره معامله کوي چې د ايران د وګړو لپاره مهم دي، لکه درمل جوړول، طبي خدمات او زراعتي توليدات».
دا په داسې حال کې ده چې د نړۍ شپږو پياوړو هېوادونو په ٢٠١٥ ز کال کې له ايران سره اټومي موافقه وکړه، خو امريکا تېر کال له دغه تړون څخه د وتلو او پر ايران بيا د بنديزونو لګولو اعلان وکړ.
له هغې راهيسې د تړون اروپايي لاسليک کوونکي فرانسه، جرمني او برېټانيا د تړون د بچ پاتې کېدو هڅې کوي.
دوى له ايران سره د سوداګریزو مالونو د راکړې ورکړې لپاره د اينسټېکس سيسټم جوړ کړ، چې د امريکا د بنديزونو له کبله يې تر اوسه ښکاره نتيجه نه ده ليدل شوې.
