امریکا ته د ترکیې خبرداری؛ د بندیزونو دوام مو په زیان تمامېدلی شي

د ترکیې د بهرنیو چارو وزیر مولود چاوش اوغلو امریکا ته خبرداری ورکړی دی چې پر دې هېواد به یې د بندیزونو دوام پر زیان تمام شي. هغه ویلي، که چېرته امریکا پر ترکیه باندې بندیزونو ته دوام ورکړي نو باید له انجرلیک پوځي اډې څخه خپل سرتېري وباسي. اوغلو له اې هابر تلویزیوني شبکې سره په مرکه کې ویلي، امریکا هیڅ حق نلري چې د ایس څلورسوه دفاعي سیسټم پر سر دا هېواد وګواښي او یا هم بندیزونه ولګوي. نوموړي ویلي، که چېرته امریکا خپلو دې غیر قانوني کړنو ته دوام ورکړي نو دوی به په دې هېواد کې له انجرلیک پوځي اډې څخه د امریکایي سرتېرو د وتلو غوښتنه وکړي. نوموړي زیاته کړې، ایس 400 یو دفاعي سیسټم دی چې دوی د خپلې دفاع لپاره اخیستی دی او که چېرته امریکا اف-۳۵ جنګي الوتکې دوی ته ورنکړي نو ممکن هغه هم له روسیې څخه وپېري.