پومپیو: که عراق کې د امریکا ګټو ته زیان واوړي ایران نه پرېږدو

د امریکا د بهرنیو چارو وزیر مایک پومپیو ایران ته خبرداری ورکړی دی چې که چېرته په عراق کې د امریکا او د هغوی د ملګرو ګټو ته زیان واوړي نو واشنګټن به ایران ته غوڅ ځواب ورکړي. هغه زیاته کړې، په هغه صورت کې چې دوی او یا یې هم ملګري زیانمن شي نو ایران دې پوه وي چې په هیڅ صورت به یې په کراره پرېنږدي. پومپیو دغه راز ایران په سیمه کې په نیابتي جګړو تورن کړی دی او ګواښ یې کړی دی چې که چېرته دا هېواد په سیمه کې له ترهګریزو کړنو لاس وانخلي نو په زیان به یې تمام شي. پومپیو دا څرګندونې وروسته تر هغه کوي چې د تېرې دوشبنې په ورځ د عراق پلازمېنه بغداد کې پر یوې دولتي ودانۍ راکټونه لګېدلي دي او پنځه عراقي سرتېري یې ټپیان کړي چې د دوو هغو یې روغتیایي وضعیت د اندېښنې وړ دی. دغه راز د تېرې چهارشنبې په ورځ هم یو بل راکټي برید شوی دی خو د مرګ ژوبلې په اړه یې راپور نه دی روکړل شوی.