د عراق لوی مذهبي مشر ایت الله سیستاني د حکومت ضد لاریونوالو وژنه او تښتونه جنایت بللې او غوښتنه یې کړې چې پکار ده ټولې وسلې او مهمات د دولت په کنټرول کې راوستل شي.
هغه دغه راز خبرداری ورکړی چې د لاریونوالو پر وړاندې د جنایت روانه لړۍ باید ژر تر ژره ودرول شي.
دا په داسې حال کې ده چې د فرانسې خبري اژانس په حواله، له کله چې د اکټوبر مياشتې په لومړۍ نېټه په عراق کې د حکومت ضد لاریونونه پيل شوي، شاوخوا ٤٦٠ کسان پکې وژل شوي او ۲۵ زره نور ټپيان شوي چې ډېرى يې لاریون کوونکي دي.
د اداري فساد، بېکارۍ او د کمزورو ټولنيزو خدماتو له کبله دغه لاریونونه په پلازمېنه بغداد او د عراق د جنوب په هغو سيمو کې روان دي، چې ډېرى اوسېدونکي يې شيعه دي.
خو په دې وروستيو کې تقريباً هره ورځ په پلازمېنه او جنوبي ښارونو کې لاریونوال نادرکه کېږي او په ډېریو مواردو کې دوى له اعتراضونو کورونو ته د ستنېدو پر مهال تښتول کېږي.
د عراق مخکښ شيعه ملا ايت الله علي سيستاني په کربلا کې وويل: «د اعتراض کوونکو دردوونکې وژنه او هغه څه چې په دې وروستيو ورځو کې پېښېږي، له قتلونو نيولې د اعتراض کوونکو تر تښتولو پورې د هغه څه اهميت په ډاګه کوي، چې ديني مراجع ورباندې ټينګار کوي، هغه دا چې اړتيا ده ټولې وسلې د دولت له خوا کنټرول شي».
بلخوا د بښنې نړيوال سازمان د عراق له حکومته غوښتي، چې له هغه څه لاس واخلي چې دغې ادارې د اعتراض کوونکو د ترور او ويشتلو کمپاين بللى دى.
په ورته وخت کې لاریونوالو بیا ايران پلوه وسله والې ډلې تورنې کړې چې د خلکو په دغو وژنو او تښتولو کې لاس لري.
سيستاني په خپلو خبرو کې د وړمې ورځې برید ته اشاره کړې چې نامعلومو وسله والو د بغداد په هغه ساحه کې چې اعتراض کوونکو له څو ورځو پکې کمپ جوړ کړى، پر يوې څو پوړيزې ودانۍ چاپه ووهله او اور يې ور واچاوه.
روغتيايي سرچينو او عيني شاهدانو ويلي چې په پېښه کې لږ تر لږه ٢٠ اعتراض کوونکي او څلور پوليس وژل شوي او شاوخوا ٨٠ نور اعتراض کوونکي تښتول شوي دي.
سيستاني له حکومته د هغو کسانو د مجازاتو غوښتنه کړې چې په ناکراريو کې لاس لري، هغه له اعتراض کوونکو هم غوښتي چې سوله ييز اعتراضونه دې کوي.
