د ۲۰۲۰ ز کال په پيل کې په چين کې يوه بې سارې مبارزه په ناڅاپي توګه رامنځ ته شوې. د نوي کورونا ويروس د ساري ناروغۍ چټکه او پراخه خپرېدا او د دې ناروغۍ د وقايې او کنټرول ستونزمنه کچه د چين ولسي جمهوريت له جوړېدو راهيسې ساری نه لري.
د چين د کمونېست ګوند، پوځونو او د هېواد د بېلابېلو قومونو خلکو د ګوند د مرکزي کمېټې د عمومي منشي شي جين پينګ په لارښوونه، له مهمو حکمونو سره سم د خلکو ژوند او روغتيا ته لومړيتوب ورکړی. د نوموړې ناروغۍ د وقايې او کنټرول او د اقتصادي او ټولنیز پرمختګ په برخو کې يې د هېواد د ميکانېزم غوره والي په کارولو سره بېلابېل کارونه تر سره کړي او په لنډه موده کې يې د زياتو ستونزو تر له منځه وړلو وروسته، پر وضعیت برلاسي او پکې څرګند ښه والی رامنځ ته کړی دی.
د دغې ځانګړې مبارزې پر وړاندې، د چين د کمونېست ګوند د مرکزي کمېټې عمومي منشي شي جين پينګ له دغه ګوند او ټول هېواد څخه د باور خپلولو، د ستونزو د حل لپاره د ګډو کوښښونو، د دې ناروغۍ د علمي وقايې او علاج او له مشخصو وضعيتونو سره سم د مناسبو تګلارو د نيولو غوښتنې کړې چې په دغه مبارزه کې د برياليتوب د تر لاسه کولو لپاره يې چينايانو ته د مفکورې لارښوونه ورکړې ده. شي جين پينګ د نوي کورونا ويروس د ساري ناروغۍ د رامنځ ته کېدو او خپرېدو په لومړۍ مرحله کې له دې ناروغۍ سره د مبارزې لپاره حکم او مسووليت ته مهم ارزښت ورکړ، د مبارزې په سخته مرحله کې یې پر کوښښونو د ټينګار کولو خبرداری وړاندې کړ او د وضعيت د ښه والي په مرحله کې يې له مشخصو وضعيتونو سره سم د کارونو او توليدي چارو د بيا پيل غوښتنه وکړه. د دغو مناسبو حکمونو او لارښوونو له امله په چين کې له دغې ناروغۍ سره د مبارزې پېچلی او سخت حالت ښه شوی او د روغتيا نړيوال سازمان د چارواکو په ګډون، نړيوالې ټولنې دا هڅې ستایلې دي.
کوم کار په ټول هېواد کې د کورونا ويروس له ساري ناروغۍ سره په مبارزه کې تر ټولو مهم دی؟ شي جين پينګ دې ته په اشاره وايي: «که ووهان بريالی شي، نو هو بۍ ولایت به بریالی شي. که هو بۍ ولايت بریالی شي، نو ټول هېواد به بریالی شي.» د چين د کمونېست ګوند غړي څنګه په دغه مبارزه کې مخکښ رول ولوبوي؟ شي جين پينګ له دوی څخه وغوښتل چې خپل مسووليت دې پر غاړه واخلي او تر وسې پورې دې دندې په ښه توګه تر سره کړي. ساري ناروغي څنګه وقايه او کنټرول شي؟ شي جين پينګ په دې اړه اصلي لاره روښانه کړه چې د ساري ناروغۍ سرچينه بايد کنټرول شي او د خپرېدو لارې یې بايد پرې شي. د ناروغانو د تداوي کارونه څنګه تر سره شي؟ شي جين پينګ په دې اړه حکم ورکړ چې پر نوي کورونا ويروس ټول اخته ناروغان بايد تداوي ومني. د دې ناروغۍ د وقايې او کنټرول مجموعي کارونه بايد څنګه وټاکل شي؟ شي جين پينګ ځواب ورکړ چې په دغو کارونو کې بايد د ښارونو او کليو په استوګنځايونو کې د ناروغۍ د وقايې او کنټرول او د ناروغانو د درملنې په دوو مهمو برخو کې کارونو ته په درنه سترګه وګورو. د ساري ناروغۍ سرچينه څنګه له منځه يووړل شي؟ شي جين پينګ په دې اړه وويل چې ساينس او ټکنالوژي تر ټولو ځواکمنه وسله ده. دغه قضاوتونه او مهم حکمونه په چین کې د دې ساري ناروغۍ د وقايې او کنټرول په چلند کې څرګند او اغېزمن شوي دي. ويل کيږي چې دا د دولتي ادارې د سيسټم او توان د عصري کېدو په اړه يوه ښه بېلګه او د نوې زمانې لپاره د چين ځانګړتیا لرونکي سوسيالېزم په اړه د شي جين پينګ مفکورې د عملي کېدو ارزښتناک تمرينات دي.
پسرلی له هيلو څخه ډک فصل دی. په چين کې د عمومي منشي شي جين پينګ په لارښوونه روانه ځانګړې ولسي مبارزه هم پسرلي ته ننوځي. چينايان د ټينګ باور او يووالي په روحيه د کوښښونو په حال کې دي.
