په تېرو څو ورځو کې د برېښنا پر ستنو او د دغه شرکت پر کارکوونکو بې ساري بریدونه شوي دي. که څه هم د برېښنا پر ستنو پخوا هم بریدونه شوي وو، خو دا ځل بریدونه متفاوت، سیستماتیک او زیات دي. یو بل توپیر دا هم دی چې دا ځل د برېښنا شرکت پر کارکوونکو هم بریدونه شوي دي او هغه کارکوونکي په نښه شوي چې نړول شوې ستنې یې رغولې. په دغو بریدونو کې څو کسان ټپیان شوي او په پروني برید کې د پروان د برېښنا سوداګریز مرستیال هم شهید شوی دی. تر اوسه هېڅ چا د دغو بریدونو مسوولیت نه دی اخیستی او حکومت هم تر اوسه څوک په دغو بریدونو کې پر لاس لرلو نه دي ترون کړي. څو ورځې وړاندې امنیتي ځواکونو هغه شپږ کسان هم نیولي وو چې د برېښنا یوه لویه ستنه یې نړولې وه، خو حکومت لا هم نه دي ویلي چې دغو کسانو ولې دا کار کړی او له چا سره یې اړیکې لرلې.
خو د برېښنا پر ستنو او کارکوونکو بریدونه څوک کوي او څه غواړي؟
د برېښنا ستنې تر دې وړاندې د متفاوتو لاملونو له مخې په نښه کېدلې. کله به د طالبانو او حکومت ترمنځ په جګړه کې تخریب شوې، چې حکومت به طالبان ګرمول، خو طالبانو تل دا ډول ادعاوې رد کړې دي. د دې تر څنګ په ځینو سیمو کې غله او باج اخیستونکي وو چې له برېښنا شرکت څخه به یې د باج اخیستو هڅه کوله، چې د مماتي سالنګ په نامه یو باج اخیستونکی یې ښه بېلګه ده. د دې تر څنګ داسې هم ویل کېدل چې د تېلو مافیا وخت ناوخته په دغو بریدونو کې ښکېله وي. ځیني کسان اوس هم د تېلو د مافیا خبرې کوي؛ ځکه چې تېل په بې ساري ډول را لوېدلي دي. په افغانستان کې یې هم بیه کمه شوې ده او سم باراز هم نه لري، خو دا ځل ستونزه یو څه متفاوته ښکاري. د تېلو مافیا کولی شي، د برېښنا پر ستنو بریدونه وکړي، خو په دومره کم وخت کې، دومره زیات بریدونه ورته ستونزمن دي. بیا دا خو ورته بیخي ستونزمنه ده چې له دې بریدونه سره هممهاله د برېښنا شرکت پر هغو کارکوونکو هم چاودنې وکړي چې د دغو ستنو د رغونې لپاره سیمې ته تللي وي. داسې ښکاري چې دا چاره دې له وروستیو سیاسي کړکیچونو سره تړلي وي. په داسې حال کې چې اشرف غني او عبدالله سره جوړیږي، ځینې کړۍ له دې چارې ناراضه دي. له دغو کړیو سره په کابل، پروان او ځینو نورو ولایتونو کې ځیني جنګسالاران، جنایتکاره ډلې او غله شته چې ښکاري دا کړۍ یې پر مټ دغه بریدونه کوي. دوی ښايي غواړي له دې لارې په کابل کې په سیاسي معادلاتو کې خپل ځای پیدا کړي او په دې ډول باج واخلي.
دا یوه چټله لوبه ده چې کثیف او مافيايي سیاستوال یې کاروي. دوی د خلکو د ژوند د تیاره کولو له لارې غواړي خپلو موخو ته ورسیږي. له بده مرغه حکومت هم ډېری وخت له دغو کړیو سره معاملې کړې دي، نو ځکه دوی دغه کار تکراروي. که په کابل کې یو مسوول او ریښتینی حکومت وی، نو له دغو جنایتکارانو سره به معامله متفاوته وه. د دوی پر ضد به په سرعت سره امنیتي ځواکونه کارول شوي وو، ورپسې به عدلي او قضايي ارګانونو په چټکۍ سره قانون عملي کړی وای او ژر به خلکو د دغو جنایتکارانو او د دوی د ملاتړو مړي د برېښنا پر ستنو را ځېړېدلي، لیدلي وای.
