د اشرف غني د لوړې له مراسمو درې میاشتې تېرېږي، خو لا یې هم نه کابینه شته او نه یې هم د هغو ژمنو د عملي کولو لپاره څه کړي چې له خلکو سره یې کړې وې. ښايي حکومت د دې لامل له ډاکټر عبدالله سره ټاکنیزې لانجې یادې کړي، خو له عبدالله سره له هوکړې هم کافي وخت تېر شوی، خو بیا هم نوماند وزیران د رایې اخیستو لپاره ولسي جرګې ته نه دي ور پېژندل شوي. یوازې څو وزارتونو ته نوي سرپرستان او کاندید وزیران ور پېژندل شوي دي، خو لویه برخه کابینه همغسې پاتې ده.
موږ پوهېږو چې اوس به بیا عبدالله او اشرف غني په وزیرانو نه سره جوړېږي او لانجې به یې وي. د دې تر څنګ به د ولسمشر او د هغه د مرستیالانو او سیاسي شریکانو ترمنځ هم پر وزیرانو لانجې وي. له بله اړخه به ډاکټر عبدالله له خپلو شریکانو سره د ورکړل شوي واک او څوکیو د وېش په لانجه کې وي. په دې ډول به دا دوره هم نیمايي کابینه سرپرسته او له لانجو سره مخ وي. تر اوسه پورې چې څو وزارتونو ته سرپرستان او کاندیدان هم ټاکل شوي، له بده مرغه ښکاري چې راتلونکې کابینه او لویې څوکۍ به بیا هم د وړتیا پر ځای تر ډېره د سیاسي مصلحتونو پر اساس وېشل کېږي.
له یوه اړخه حکومتي مشران په سیاسي معاملو بوخت دي، حکومت او حکومتولي یې مسخره کړې، له بله اړخه ولسي جرګې ته هم داسې وکیلان راغلي چې خپله دنده ترې هېره ده او پر خپلو سوداګریو، معاملو او کیسو بوخت دي. په دوی کې ځینې یې کله کله له حکومت څخه د کاندید وزیرانو د ور پېژندنې غوښتنه وکړي، خو اکثریت یې غلي دي او داسې حالت یې غوره کړی، لکه دا چې د دوی دنده نه وي او یا هم د حکومت یو داسې اداره وي چې هر څه ارګ کوي، دوی یې باید ومني او پرې غلي شي. د بې کفایته، معاملګرې، د ولس له دردونو او ستونزو د ناخبره ولسي جرګې موجودیت د دې سبب شوی چې حکومت لا زیات په دې برخه کې بې توپیره شي او همداسې په ناقانونه ډول واک ووېشي او اکثریت وزارتونه د سرپرستانو په وسیله رهبري کړي. که ولسي جرګه مسوولانه عمل وکړي، د حکومت چلند به بدل شي، کابینه به ژر تکمیل شي، د ناوړه وزیرانو مخه به ونیول شي او وړ کسان به راوړل شي، خو که ولسي جرګه همداسې وي، نو کیسه لا خرابیږي.
حکومتي مشرانو ته پکار ده چې نور پر دې ولس رحم وکړي. کله یې چې واک په ناقانونه ډول ووېشه، اوس باید دواړه اړخونه ژر له خپله اړخه وړ، مسلکي، په کارپوه، ژمن او صادق خلک معرفي کړي چې له ولسي جرګې د باور رایه واخلي. دوی ته پکار ده چې په دې چاره کې بېړه وکړي، ځکه اوسنی حالت او د سرپرستانو له خوا د وزراتونو رهبرۍ نه یوازې د حکومت پر کړنو ناوړه اغېز کړی، بلکې فساد او ګډوډۍ یې هم زیاتې کړي دي او اصلي زیان یې ولس ته رسیږي.
