ویل کېږي چې د جون په پای کې به د سولې بین الافغاني خبرې پیل شي. که څه هم ټاکل شوې وه چې د جون په ۱۵مه لومړنۍ بین الافغاني خبرې وشي، خو د طالب بندیانو نه خوشي کېدو او ځینو نورو ستونزو د دې خبرو پیل وځنډاوه. اوس هم د جون په پای کې د رسمي خبرو د پیل پر ځای د لومړنۍ ناستې او لیدنې خبره کېږي، خو ایا ستونزه حل شوې ده او د سولې پر وړاندې شته خنډونه له منځه تللي دي؟
د بین الافغاني خبرو د پیل پر وړاندې دوه ستر خنډونه وو. لومړنی خنډ دا و چې د هوکړې له مخې د خبرو تر پیل وړاندې باید پینځه زره طالب بندیان خوشې وی، خو خوشې نه شول. دویم خنډ دا و چې طالبانو نه منله چې د افغانستان له حکومت سره به خبرې کوي. اوس دا دی تر دریو زرو پورې بندیان خوشې شوې دي او حکومت وايي چې دوه زره نور طالب بندیان به هم خوشې کړي. دا د خلیلزاد له وروستي سفر سره سم د حکومت په دریځ کې یو لوی بدلون و. که حکومت پر خپله خبره او ژمنه عمل وکړي او پاتې بندیان هم خوشې کړي، نو د بین الافغاني خبرو پر وړاندې یو لوی خنډ لرې شوی دی.
د دویم خنډ په اړه لا وضاحت نشته. طالبانو پخوا ویلي وو چې دوی له یوه افغاني پلاوي سره خبرې کوي چې حکومت یې هم یوه برخه وي. اوسنی پلاوی حکومت اعلان کړی، خو وايي چې د سیاسي ګوندونو، مدني ټولنې او ښځو استازي هم پکې شته. کله چې دا پلاوی اعلان شو، طالبانو رد کړ او ویې ویل چې سیاسي ګوندونه او مختلف اړخونه له دې پلاوي سره مخالف دي، نو ځکه دوی هم ورسره خبرې نه کوي. په دې اړه د طالبانو تازه دریځ نشته، چې ایا دوی پر خپله پخوانۍ خبره ولاړ دي او که دریځ یې بدل شوی او له همدغه پلاوي سره خبرې کوي. طالبان تر فشار لاندې وو چې له همدغه پلاوي سره خبرې وکړي، خو ویل کېږي چې طالبانو په پلاوي کې د ځینو بدلونونو غوښتنه کړې ده. اوس که حکومت پر همدې پلاوي ټینګار وکړي او طالبان ورسره خبرې ونه مني، نو بیا خو ستونزه نه ده حل شوې او بین الافغاني خبرې به همداسې له خنډ او ځنډ سره مخ وي. ویل کېږي چې داسې یوه هڅه هم روانه ده چې حکومت په همدې پلاوي کې بدلون راولي، ښايي ځینې کسان پکې زیات کړي او بیا له هغه وروسته هغه سیاسي اړخونه چې پخوا یې د دې پلاوي مخالفت کړی و، له دې پلاوي رضایت وښيي، نو طالبان به هم حاضر شي چې له دې پلاوي سره خبرې وکړي او بین الافغاني خبرې پیل شي. د خلیلزاد د ورستي سفر یو اساسي هدف هم همدا ګڼل شوی او ویل شوي چې پرمختګونه هم پکې شوې دي.
د بین الافغاني خبرو پیل خورا مهم دی او خلک یې غوښتنه کوي. په دې برخو کې له دوو خنډونو یو یې د حل کېدو په درشل کې دی او حکومت باید دا خنډ لرې کړي. د دویم خنډ د لرې کولو لپاره باید طالبان او حکومت دواړه انعطاف وښيي، چې ژر تر ژره بین الافغاني خبرې پیل شي او رېښتیني سولې ته لاره هواره کړي.
